Nepal's No.1 Filmy Web Magazine

चर्चित हिप–हप गायक बालेन्द्र शाह (बालेन) प्रधानमन्त्री बनेसँगै कलाकारहरूले खुसी व्यक्त गरेका छन् । राष्ट्रिय स्वतन्त्र पार्टी (रास्वपा)बाट देशको ४३ औं प्रधानमन्त्री बनेका उनलाई कलाकारहरूले सामाजिक सञ्जालमार्फत बधाई दिँदै सफल कार्यकालको शुभकामना व्यक्त गरेका छन् । उनीबाट कलाकारहरूले देशमा ठूलो परिवर्तन र सुशासनको आशा समेत राखेका छन् । 

एक सातादेखि भारतीय फिल्म ‘धुरन्धर २’को नेपालका हलमा एकछत्र दबदबा छ । देशभरका अधिकांश हलहरूको शो यही फिल्मको कब्जामा छ भने दर्शकहरू मध्यरातसम्म हलमा ओइरिरहेका छन् । नेपालमा यो फिल्मको क्रेज हेर्दा अझै २-३ साता नेपाली बक्स अफिस राम्रै चलायमान हुने देखिन्छ । फिल्मले नेपालमा २० करोडमाथि कमाउन सक्ने आँकलन गरिएको छ ।

टिकटक स्टार तथा अभिनेता पारस बम ठकुरी (कुल ब्वाय) र अभिनेत्री दिव्या रायमाझी पहिलो पटक फिल्ममा एकसाथ देखिने भएका छन् । फिल्म ‘बेहुली’मा उनीहरूको जोडी बाँधिन लागेको हो । यो फिल्मको बिहीबार ललितपुरस्थित कार्यविनायक मन्दिरमा धार्मिक विधिअनुसार पूजाआजा गर्दै शुभ मुहूर्त गरिएको छ । फिल्मको छायांकन भने यसै साताबाट सुरू हुनेछ । 

अभिनेता जितु नेपाल (मुन्द्रे)को मुख्य भूमिका रहेको फिल्म ‘आइएम जितबहादुर’को फर्स्टलुक टिजर सार्वजनिक गरिएको छ । फिल्मका मुख्य पात्रको मनोभाव र संघर्षलाई झल्काइएको टिजरमा साउन्ड र ग्राफिक्स स्तरीय देखिन्छ । ग्राफिक्समार्फत जितुको पात्रलाई विभिन्न अवस्थामा देखाइएको छ, जहाँ उनी कहिले घाइते त कहिले खुसी र गहिरो पीडामा देखिन्छन् ।

तेलुगु अभिनेता पवन कल्याणको विगत केही वर्षयता फिल्मी करिअर सुखद् देखिएको छैन । उनका एकपछि अर्को फिल्मले बक्स अफिसमा कमजोर व्यापार गरिरहेका छन् । अब उनको अर्को नयाँ फिल्म ‘उस्ताद भगत सिंह’ पनि फ्लप भएको छ । बलिउडको ‘धुरन्धुर २’सँग एकसाथ रिलिज भएको यो फिल्मले प्रदर्शनको एक सातामा आधा बजेट पनि उठाउन सकेको छैन ।

फिल्मको प्रचारका लागि गीतसंगीत महत्त्वपूर्ण मानिन्छ । गीतले फिल्मप्रति दर्शकको चासो र उत्साह बढाउन ठूलो भूमिका खेल्ने गरेको छ । तर, वर्षमा एकाध फिल्मका गीत मात्र दर्शकको रोजाइमा पर्ने गरेका छन् । यस वर्षकै कुरा गर्ने हो भने ‘डोको बुन्ने’, ‘काफ्ले’, ‘चाइनेजो जिन्दगानीमा’, ‘मखमली’, ‘न्याउली वनैमा’ जस्ता फिल्मी गीत निकै लोकप्रिय भए ।