Nepal's No.1 Filmy Web Magazine
आगामी असोज ३ गते अर्थात् संविधान दिवसको विदामा एउटै समुदायको कथामा बनेका दुई फिल्मबीच भिडन्त हुने भएको छ । ती फिल्म हुन्, ‘सोल्टिनी’ र ‘जारी २’ । अर्जुन सुवेदीको निर्देशन रहेको ‘सोल्टिनी’ले ६ महिनाअघि नै असोज ३ गतेलाई प्रदर्शन मिति घोषणा गरेको थियो । ‘जारी २’को भने शुक्रबार तीनवटा पोस्टर सार्वजनिक गर्दै प्रदर्शन मितिबारे जानकारी गराइएको हो ।
यतिबेला छायांकनमा रहेको फिल्म ‘मिरमिरे’ माघे सङ्क्रान्तिको विदा पारेर आगामी माघ १ गतेबाट प्रदर्शनमा आउने भएको छ । शुक्रबार फिल्मकी मुख्य अभिनेत्री सिर्जना निङलेखुको जन्मदिनको अवसरमा निर्माण पक्षले प्रदर्शन मितिबारे जानकारी गराएको हो । वितरकसँगको सल्लाहमा फिल्मलाई माघ १ गते प्रदर्शन गर्न लागिएको निर्देशक यम शेर्पाले बताए ।
यसपालिको दशैंको फूलपाती अर्थात् असोज १३ गतेबाट प्रदर्शनमा आउन लागेका तीन नेपाली फिल्ममध्येको एक ‘माइतीघर’को पहिलो आधिकारिक पोस्टर सार्वजनिक गरिएको छ । मिलन तामाङको निर्देशनमा बनेको फिल्मको शुक्रबार सार्वजनिक पोस्टरले पात्रहरुको गेटअप, लुक्स र मुडलाई दर्शाएको छ ।
‘नाईँ नभन्नू ३’ र ‘समर लभ’का निर्देशक मुस्कान ढकाल ६ वर्षपछि निर्देशनमा फर्किने भएका छन् । उनको निर्देशनमा बन्न लागेको नयाँ फिल्म ‘रत्यौली’को शुक्रबार थिम पोस्टर सार्वजनिक गर्दै निर्माण घोषणा गरिएको छ । पोस्टरको पृष्ठभूमिमा ढुंगा र माटोले बनेको एउटा सानो घर देखिन्छ । यसले ग्रामीण परिवेशको कथामा फिल्म बन्न लागेको संकेत गर्छ ।
कथाकार गुरुप्रसाद मैनालीको चर्चित कथा ‘परालको आगो’मा आधारित भएर निर्माण हुन लागेको सोही नामको फिल्ममा अभिनेता सौगात मल्लको प्रवेश भएको छ । उनलाई निर्माण पक्षले जुठे दमाईको पात्रको भूमिकामा अनुबन्ध गरेको हो । यसअघि यो भूमिकामा अभिनेता जितु नेपाल देखिँदै थिए । तर, उनले नभ्याउने भएपछि फिल्ममा सौगातलाई लिइएको हो ।
यसपालिको दशैंको फूलपाती अर्थात् असोज १३ गते नेपाली फिल्मबीच त्रिपक्षीय भिडन्त हुँदैछ । ‘बलिदान’, ‘हरिबहादुरको जुत्ता’ र ‘माइतीघर’ गरी तीन फिल्म एकसाथ प्रदर्शनको तयारीमा छन् । यसमध्ये ‘बलिदान’ले प्रचारलाई आक्रामक तुल्याइरहेको अवस्थामा ‘हरिबहादुरको जुत्ता’को टिम पनि फर्स्टलुक पोस्टर सार्वजनिक गर्दै प्रचारमा उत्रिएको छ ।
