Nepal's No.1 Filmy Web Magazine
यतिबेला हलमा ६ वटा नेपाली फिल्म प्रदर्शनरत छन् । तीमध्ये बक्स अफिसको अंकगणितमा ‘लालीबजार’ सबैभन्दा अगाडि देखिएको छ । गत वैशाख २५ गतेबाट प्रदर्शनमा आएको यो फिल्मले जेठ ३१ गते आइतबार (हिजो)सम्म ९ करोडमाथिको व्यापार गरेको चलचित्र विकास बोर्डको तथ्यांकमा देखिन्छ । यसको कुल कमाइ ९ करोड १६ लाख ६५५ रुपैयाँ ग्रस छ ।
राजबहादुर सानेको निर्देशनमा बन्न लागेको फिल्म ‘गंगा रानी’मा मुख्य अभिनेताको टुंगो लागेको छ । निर्माण टिमले अडिसनबाट रोशन केसीलाई फिल्ममा अनुबन्धित गरेको हो । फिल्मको डिजिटल अडिसनमा रोशनसहित करिब ५ सयजना सहभागी भएका थिए । तीमध्ये अभिनय क्षमताको आधारमा रोशनलाई अनुबन्धित गरिएको निर्देशक सानेले बताए ।
दीपकराज गिरी र दीपाश्री निरौला समूहको नयाँ फिल्म ‘छ माया छपक्कै २’को यतिबेला नुवाकोटमा छायांकन भइरहेको छ । छायांकनको अन्तिम चरणमा रहेको फिल्मको कलाकारको पूर्ण लाइनअप अझै सार्वजनिक भइसकेको छैन । दीपकराज गिरी, केकी अधिकारी, सनिशा भट्टराई र निर्मल शर्माबाहेक अन्य कलाकारको नाम गोप्य राखिएको छ ।
बाल मनोविज्ञानको कथामा आधारित फिल्म ‘रोल नं १’ले आफ्नो लक्षित दर्शकको साथ पाउन थालेको छ । केही दिनयता उल्लेख्य रूपमा बालबालिकाहरू अभिभावकको साथमा हल पुगिरहेका छन् । पूर्वदेखि पश्चिमसम्मका विद्यालयहरूमा त विद्यार्थीहरूलाई फिल्म देखाउने प्रतिस्पर्धा नै चलेको छ । जसले फिल्मको व्यापारमा ठूलो फाइदा पुगेको छ ।
अभिनेत्री सुस्मिता बम्जनले अभिनेता भुवन केसीसँग विवाह गरेपछि आफ्नो थर परिवर्तन गरेर केसी राखेकी थिइन् । अनमोल जन्मिएको केही वर्षपछि भुवनसँग सम्बन्ध विच्छेद गरेकी उनले अहिलेसम्म केसी थर भने फेरेकी छैनन् । उनले प्रयोग गर्ने सामाजिक सञ्जाल फेसबुक र इन्स्टाग्राम हेर्ने हो भने उनले केसी नै थर राखेकी छन् ।
