Nepal's No.1 Filmy Web Magazine

शुक्रबारदेखि प्रदर्शन हुन लागेको फिल्म ‘अभिमन्यु’को सोमबार साँझ ललितपुरस्थित लबिम मलको क्यूएफएक्स हलमा प्रिमियर गरिएको छ । फिल्मकर्मीहरूको उल्लेख्य उपस्थिति रहेको प्रिमियरमा सहभागीहरूले फिल्मको कथ्य शैली, निर्देशन र कलाकारहरूको अभिनयको प्रशंसा गर्दै फिल्मले दर्शकलाई सुरुदेखि अन्त्यसम्म बाँधेर राख्ने प्रतिक्रिया दिएका छन् ।

स्वर्गीय निर्देशक शिव रेग्मीले लेखेका थुप्रै गीतहरूमध्ये ‘पाहुना’ कालजयी मानिन्छ । सन् २००३ मा प्रदर्शन भएको फिल्म ‘पाहुना’मा उक्त गीत समावेश थियो । यही गीतलाई नयाँ एरेन्जमेन्टसहित निर्देशक रेग्मीकै भान्जी एकता पौडेलले आफ्नो पहिलो निर्देशकीय फिल्म ‘हर्ष’मा समावेश गरेकी छन् । यो गीत सोमबार युट्युबमार्फत सार्वजनिक गरिएको छ ।

प्रभात पाल र स्मारिका ढकालको रोमान्सलाई समेटिएको गीत ‘मेरो प्रियतम’ सार्वजनिक भएको छ । आगामी पुष १० गतेबाट प्रदर्शनमा आउन लागेको फिल्म ‘मुगलान’मा समावेश यो गीत सोमबार सार्वजनिक भएको हो ।

लभ स्टोरी फिल्मका ज्ञाता मानिने निर्देशक दिनेश राउतको नयाँ प्रेम कथानक ‘कुमारी’को पहिलो गीत 'कता छौ मेरो फूल’ सार्वजनिक भएको छ। गीत सार्वजनिकसँगै निर्माण टिमले फिल्मको रिलिज मिति पनि घोषणा गर्दै माघ २३ गते देशभर प्रदर्शनमा आउने जनाएको छ। रिलिज मिति ‘भ्यालेन्टाइन डे’ नजिक परेकाले फिल्मले युवा दर्शकलाई लक्ष्य लिएको बुझिन्छ।

कीर्तिमानी फिल्म ‘पूर्ण बहादुरको सारङ्गी’को निर्माण समूहको नयाँ फिल्म ‘रोल नंं. १’को छायांकन सुरु गरिएको छ । दुई हप्ता लामो वर्कसपपछि सोमबार म्याग्दीबाट फिल्मको छायांकन थालिएको हो । डेढ महिना छायांकन हुने यस फिल्ममा मुकुन भुसाल, सुशांक मैनाली, रेणु योगी, सिर्जना अधिकारी, शुन्दर धिताल र निर्भिक रेग्मीको अभिनय रहनेछ ।

राजु गिरीको निर्देशनमा तयार भएको फिल्म ‘डल्लेले इन्ट्री मार्‍यो’ आगामी चैत २७ गतेदेखि प्रदर्शनमा आउने भएको छ। सोमबार निर्माण पक्षले फर्स्टलुक पोस्टर सार्वजनिक गर्दै प्रदर्शन मिति घोषणा गरेको हो । पोस्टरमा कलाकार सागर लम्साल ‘बले’लाई सोलो रूपमा प्रस्तुत गरिएको छ, जहाँ उनलाई तनावयुक्त मुद्रामा देखाइएको छ ।