तमिल सुपरस्टार थलापति विजयले केही दिनअघि मात्र तमिलनाडुको मुख्यमन्त्री पदको शपथ लिए । उनले पदभार ग्रहण गरेसँगै तीन वर्षदेखि तमिलनाडुमा प्रतिबन्ध रहेको फिल्मको बिहानी शो खुला गर्न अनुमति दिएका छन् । सन् २०२३ मा एउटा ठूलो घटनापछि तमिलनाडु सरकारले सुरक्षाको कारण देखाउँदै फिल्मको बिहानी शो राख्न प्रतिबन्ध लगाएको थियो ।
विजयले सूर्या र तृषा कृष्णन अभिनीत नयाँ फिल्म ‘करप्पू’का लागि बिहान ९ बजेदेखि शो खुलाउन अनुमति दिएको भारतीय मिडियाले जनाएका छन् । यसबारे फिल्मको प्रोडक्सन हाउस ड्रिम वारियर पिक्चरले पनि सामाजिक सञ्जालमार्फत जानकारी गराएको छ । तमिल भाषाको ‘करप्पू’ यही १४ मे (भोलि)देखि प्रदर्शनमा आउँदैछ ।
विजयले यो फिल्मलाई बिहान ९ बजेदेखि प्रदर्शन गर्न अनुमति दिनुको पछाडि तृषासँगको सम्बन्धलाई मुख्य कारण मानिएको छ । लामो समयदेखि उनको नाम तृषासँग जोडिँदै आएको छ । विजयले विधानसभाको चुनाव जितेपछि उनलाई बधाई दिन तृषा घरमै पुगेकी थिइन् । विजयको शपथ समारोहमा पनि उनी सहभागी थिइन् । यसले पनि उनीहरूको सम्बन्धबारे संकेत गर्छ ।
२०२३ देखि तमिलनाडुमा थियो बिहानी शोमा प्रतिबन्ध
सन् २०२३ मा प्रदर्शन भएको अजित कुमार अभिनीत फिल्म ‘थुनिवु’देखि तमिलनाडुमा बिहानी शोमा प्रतिबन्ध लगाइएको थियो । उक्त फिल्मको बिहान ४ बजेको शोमा भागदौड मच्चिँदा एकको मृत्यु भएको थियो । त्यसपछि तमिलनाडु सरकारले सुरक्षालाई ध्यानमा राख्दै बिहानका शोमा रोक लगाउने निर्णय गरेको थियो । अब उक्त प्रतिबन्ध हटेको छ ।
