नेपाली नयाँ वर्षको अवसर पारेर फिल्म ‘नोभेम्वर रेन’ को च्यारेटी गरिएको छ । वैशाख १ गते पुर्वको बाराही फिल्म हलमा नोभेम्वर रेनको च्यारेटी गरिएको हो ।
च्यारेटीमा सहभागी दर्शकले ‘नोभेम्वर रेन’लाई मन पराइदिएपछि निर्माण युनिट यतिबेला दंग छ । स्थानीय मञ्जरी कला केन्द्रको आयोजनामा सम्पन्न भएको च्यारेटीमा हल क्षमता भन्दा तीन सय बढी दर्शक सहभागी भएको निर्माण युनिटले बताएको छ । प्राप्त जानकारी अनुसार 'नोभेम्वर रेन' हेर्न बाराही हलमा एक हजार दर्शक पुगेका थिए ।
निर्माण युनिट यतिबेला फिल्म प्रोमोशनको लागि पूर्वका विभिन्न स्टेशनमा पुगेको छ । वैशाख १ गते सम्पन्न च्यारेटीमा अभिनेता तथा निर्माता आर्यन सिग्देल, निर्देशक दिनेश राउत लगायत त्यहाँ पुगेका थिए । ‘नोभेम्वर रेन’ मा अभिनेता आर्यन सिग्देल र अभिनेत्री नम्रता श्रेष्ठको जोडी दोश्रो पटक दोहोरिदै छ । आर्यन र नम्रतालाई छुल्ठिम गुरुङले पनि साथ दिएकी छिन् ।
आर्यनसँगै सुवास गिरी ‘नोभेम्वर रेन’ का निर्माता हुन् । निर्माता समेत आफैं भएकाले आर्यनको आगामी फिल्मी करिअर ‘नोभेम्वर रेन’ निर्धारन गर्ने विश्लेषण छ । फिल्म यही वैशाख १२ गते अल नेपाल प्रदर्शन हुँदैछ ।