नव वर्ष ०७१ सालको आगमन अवसर पारेर अभिनेत्री रेखा थापाको फिल्म ‘हिम्मतवाली’ को ‘फस्ट लुक’ सार्वजनिक गरिएको छ । ०७१ सालकै फुलपातीमा रिलिज गरिने ‘हिम्मतवाली’ को पोस्टरमा रेखा बोल्ड रुपमा प्रस्तुत भएकी छिन् ।
सार्वजनिक गरिएको पोस्टरमा ‘हिम्मतवाली’ हिरोलाई भने लुकाइएको छ । रेखा फिल्मस्का यसअघिका फिल्ममा जस्तै रेखा ‘हिम्मतवाली’ सोलो रुपमा प्रस्तुत भएकी छिन् । दुवै हात गुमाएका सुदर्शन गौतमको समेत अभिनय रहेका कारण रेखाको ‘हिम्मतवाली’ चासो र चर्चाबाट घेरिएको छ ।
सँगसँगै नियमित निर्देशक श्याम भट्टराईसँगको विवादका कारण पनि फिल्मले राम्रो चर्चा बटुलेको छ । यद्यपि रेखाले फिल्मका कलाकार सुदर्शन बारे औपचारिक रुपमा भने अभिव्यक्ति दिएकी छैनन् ।
‘हिम्मतवाली’ बाट रेखाले फिल्म निर्देशन समेत हात बढाएकी छिन् । फिल्ममा बसन्त सापकोटा र टंक बुढाथोकीको संगीत छ । अभिनयमा आफूलाई अब्बल प्रमाणित गरेकी रेखाले निर्देशनमा भने आफूलाई कसरी कुन स्तरको प्रमाणित गर्छिन् चासोको विषय बनेको छ ।
