बेल्जियम लैजान्छु भन्दै करोडौंको ठगी भनी लगाइएको आरोपप्रति कलाकार दिनेश शर्माले खण्डन गरेका छन् । चैत २७ गते रिपोटर्स क्लबमा प्रेसमिट गर्दै उक्त आरोपको दिनेशले खण्डन गरेका हुन् ।
प्रेसमिटमा कलाकार शर्माले कान्तिपुर दैनिकमा प्रकाशन भएजस्तो ठगीमा आफ्नो कुनै संलग्नता नभएको प्रष्ट्याए । करिब दुई दशकदेखि कलाकारिता क्षेत्रमा संलग्न शर्माले भने, ‘यदि मैले ठगी गरेको भए म आज यहाँ हुदैनथें होला । म ठग हैन ।’ उनले ठगीको आरोप लाग्नुलाई आफ्नो दिन बिग्रिएको बताए ।
त्यस्तै कलाकार संघबाट नक्कली परिचयपत्र बनाई ५० लाख लिएको भन्ने अरोप पनि उनले निराधार रहेको उल्लेख गरे । शर्माले भने, ‘म आफु सप्रिएर अरुलाई सप्रिउँ भन्ने मान्छे हुँ । मैले कसरी त्यस्तो गर्न सक्छु ? म इमान्दार कलाकार हुँ । यस्तो कुराले मलाई दुःखी बनाएको छ । म बाँचुञ्जेल कलाकारितामा रहि रहनेछु ।’
आरोपको खण्डन गर्न गरिएको प्रेसमिटमा कलाकार शर्माले आफ्नै लेखन, निर्देशन तथा निर्माण भएको फिल्म ‘दानब’ को पनि घोषणा गरे । यो फिल्ममा दिनेश स्वयम् मुख्य कलाकारको रुपमा देखिदैं छन् ।
