'तक्मे बुढा'को नामले प्रख्यात अभिनेता विल्सन विक्रम राईले अर्का अभिनेता सुनील थापाको पहलमा बलिउडको यात्रा तय गर्ने भएका छन् । विल्सनले निर्देशक आशुतोष गोवारीकेरको नयाँ टिभी सिरियल खेल्न लागेका हुन् ।
हाल 'अधकट्टी' फिल्ममा व्यस्त रहेका विल्सनलाई एक साता पश्चात बलिउड निम्तो गरिएको छ । विल्सन बलिउड जाने तयारी गर्दा सुटिङ भईरहेको फिल्म 'अधकट्टी' युनिटलाई भने तनाव भएको छ । सुटिङ सकिनु अगावै विल्सनलाई बलिउडबाट बोलाईएपछि युनिटमा तनाव सिर्जना भएको हो । अहिले सुटिङ युनिट विल्सनको समय तालिका कसरी मिलाउने भन्ने छलफलमा रहेको बुझिएको छ ।
‘लगान’, ‘स्वदेश’ तथा ‘जोधा अकबर ’ जस्तो चर्चित फिल्म बनाएका निर्देशक गोवारीकेरको नयाँ टिभी सिरियलमा विल्सन हिमाञ्चल प्रदेशको एक शेर्पाको भूमिकामा देखिने बताईन्छ । स्टार प्लसबाट अनएयर हुने उक्त सिरियलमा अभिनय गर्न उनी चैत्र १४ गते भारत प्रस्थान गर्दैछन् ।
