सूर्य बोहराले निर्देशन गर्ने ‘ठूली’ नामक फिल्ममा अभिनेत्री गरिमा पन्त शिर्ष भूमिकामा प्रस्तुती हुने भएकी छिन् । निर्देशक बोहरा र सुनिल बस्नेतको संयुक्त लगानी रहने ‘ठूली’ फिल्म यही चैत १० गतेदेखि फ्लोरमा जाँदैछ ।
गरिमाले ‘ठूली’ फिल्ममा आफ्नो ‘वोल्ड’ भूमिका रहेको बताइन् । उनले भनिन्, ‘यसमा मेरो अन्याय अत्याचार विरुद्ध लड्ने सशक्त नारीको भूमिका छ तर रोएर हैन ।’ काठमाण्डौं र चितवनमा छायाँकन हुने ‘ठूली’का अन्य कलाकारलाई निर्माण युनिटले गोप्य राखेको छ ।
गरिमाले सती जाने युवतीको भूमिका निभाएको ‘झोला’ फिल्मले व्यावसायिक नाफा समेत कमाएको थियो । गरिमा अभिनित ‘मनले मनलाई छुन्छ’ फिल्म चैत २८ गते अल नेपाल प्रदर्शनमा आउँदैछ । गरिमाको यो फिल्मलाई स्व.निर्देशक शिव रेग्मीले निर्देशन गरेका छन् ।
फिल्म प्रदर्शनको हिसाबले यो वर्ष लक्की देखिएकी गरिमा ‘ठूली’ पछि ‘विर गोर्खाली’ नामक फिल्मको छायाँकनमा व्यस्त हुनेछिन् । ‘विर गोर्खाली’ फिल्मको चैत ४ गतेदेखि जोमसोमबाट छायाँकन सुरु भएको छ ।
