नेपाली फिल्ममा कार्यरत निर्देशक तथा प्राबिधिकलाई लक्षित गर्दै नेपाल चलचित्र निर्देशक समाजको पहलमा 'वर्कशप अन डिजिटल फिल्मिङ' नामक कार्यशाला हुने भएको छ । चैत्र २७ गतेदेखि बैशाख १ गतेसम्म तनहुँको बन्दीपुर र पोखरामा उक्त कार्यशाला गर्न प्रस्तावित गरिएको छ ।
प्रबिधिको रूपान्तरणलाई निर्देशक तथा प्राबिधिकहरूले आत्मसाथ गर्न नसकेको अवस्थामा तीन बिदेशी प्रशिक्षकले उनीहरूलाई डिजिटलको प्रयोग सम्बन्धी ज्ञान दिन लागेका हुन् । जस्टिन डिलियन र जेम्स एभानले सहित एक अनुवादक नेपाल आएर डिजिटल फिल्मिङको बारेमा प्रशिक्षण दिनेछन् ।
४५ फिल्मकर्मीलाई सहभागी गराएर आयोजना गर्न लागिएको यस कार्यशालाले पछिल्लो समय फस्टाएको डिजिटल फिल्म मेकिङमा ठूलो सहयोग पुर्याउने आयोजक निर्देशक समाजको विश्वास छ । वर्कशपका लागि सोमबारबाट आवेदन खुल्ला गरिएको छ ।
