जेठ महिनाको चारवटै शुक्रबार प्याक भएका छन् । जेठको पहिलो सातादेखि ‘उत्सव’, 'आवरण', ‘हँसिया’ र ‘पुन्टे परेड’ फिल्म प्रदर्शन हुने पक्का भएको छ । बाँकी रहेको एउटा मितिमा पनि फिल्म प्रदर्शन गर्ने पक्का भैसकेको वितरक नरेन्द्र महर्जन बताउँछन् ।
हाल पोष्ट प्रोडक्सनमा रहेको ‘उत्सव’ फिल्म जेठको पहिलो शुक्रबार २ गते प्रदर्शन हुँदैछ । कुमार भट्टराई निर्देशित यस फिल्ममा सौगात मल्ल, गौरव पहारी, प्रकृती श्रेष्ठ, संजोग कोइराला लगायतको मुख्य भूमिका छ । जेठ २ गते नै सुवास कोईराला निर्देशित फिल्म 'आवरण' रिलिज हुनेछ । यो फिल्ममा प्रियंका कार्की, दिव्य देव, सुशिलराज पाण्डे, अनुभव रेग्मी लगायतको अभिनय छ ।
त्यस्तै जेठ ९ गते ‘हँसिया’ फिल्म प्रदर्शन हुनेछ । हेमा श्रेष्ठको खतरनाक एक्सन समावेश फिल्मको प्रोमोले यस फिल्मलाई आशातीत फिल्मको कोटीमा पर्न आएको छ । । एक्सन लेडी हेमा श्रेष्ठ र हट हिरोइन प्रियंका कार्कीले महंगो सेटमा आइटम नृत्य पस्केको ‘हँसिया’लाई मिलन चाम्सले निर्देशन गरेका हुन् । दुर्गा घलेको फिल्ममा लगानी रहेको छ ।
जेठ २३ गते ‘पुन्टे परेड’ प्रदर्शन हुनेछ । संयम पुरी शिर्ष भूमिकामा रहेको यस फिल्मलाई सुवास कोइरालाले निर्देशन गरेका हुन् । ‘उत्सव’, ‘हँसिया’ र ‘पुन्टे परेड’ लाई काठमाडौंका स्टेशनमा दर्शना आर्टस् प्रालीले वितरण गर्नेछ । जेठ १६ गते प्रदर्शन हुने फिल्मको नाम भने वितरकले सार्वजनिक गर्न चाहेका छैनन् ।
जेठमा प्रदर्शन हुने यी फिल्मको व्यापार कस्तो हुन्छ ? यी फिल्मसँग अरु कुन फिल्म जोरी खोज्न आउँछन् ? प्रतिक्षा गर्रौ ।
