नृत्य निर्देशक गोविन्द राईले पहिलो पटक निर्देशन गरेको फिल्म ‘नागबेली’ को पोस्टर तथा प्रोमोमा स्थान नदिएपछि निर शाहले घुमाउरो शैलीमा टिप्पणी गरेका छन् । शाहको टिप्पणी ठट्यौली थियो या असन्तुष्टी ? बुझ्न गार्हो भयो ।
निर्देशक गोविन्द राईलाई लक्षित गर्दै शाहले भने- ‘पोस्टरमा त राख्नु भएन, प्रोमोमा पनि टाउको निहुरिएको तालु देखिएको सिन मात्रै राख्नु भएछ नि !’ शाहले यस खालको प्रश्न गर्दा निर्देशक राई हाँसे मात्रै कुनै जवाफ दिएनन् ।
प्रोमो तथा पोस्टरमा नदेखिएका शाहले निर्देशक राईको पहिलो निर्देशकिय फिल्म रहेको ‘नागबेली’ लाई सफलताको कामना दिन भने छुटाएनन् । झन्डै १५ मिनेट बोल्नलाई समय लिएका शाहले ‘नागबेली’ सफलताको लागि नाट्यश्वेरी मातासँग कामना नै गरे । प्रोमो तथा पोस्टरमा लुकेका शाहको कामना ‘नागबेली’ फिल्मलाई कत्तिको लाग्ने हो ? प्रदर्शन पछि नै थाहा होला ।
