हिन्दी तथा अंग्रेजी फिल्मलाई मात्रै पोषण गर्ने भनेर आरोप खेपेका सुविधा सम्पन्न मल्टिप्लेक्स स्टेशनहरु केही बर्षदेखि भने नेपाली फिल्म प्रदर्शनको लागि पनि सहज बन्दै गइरहेका छन् । विशेषगरी ‘लुट’ फिल्मले ब्ल्कबस्टरको व्यापार गरेपछि शहरका मल्टिप्लेक्समा नेपाली फिल्मलाई प्रदर्शनको मौका मिलेको हो ।
बलिउडका तीन खान तथा ऋतिक रोशनको फिल्म हेर्ने उर्लिने नेपाली दर्शक मल्टिप्लेक्स पर्दामा नेपाली फिल्म हेर्न कत्तिको लाइन लाग्छन् ? छुट्टै बसहको विषय बन्ला । जे होस् पछिल्ला बर्षहरुमा सुबिधा सम्पन्न स्टेशनमा नेपाली फिल्मले प्रदर्शनको मौका पाइरहेका छन् । आउँदो शुक्रबार अर्थात पुस २६ गते प्रदर्शन हुने तीन नेपाली फिल्मले पनि सुबिधा सम्पन्न मल्टिप्लेक्स स्टेशनमा प्रदर्शनको मौका पाएका छन् ।
माघे संक्रान्ती छोप्न आएका फिल्म ‘छ एकान छ’, ‘बितेका पल’ र ‘पराई’ फिल्म कमलपोखरीको विग मुभिज र चावहिलको एफक्युवमा प्रदर्शन हुँदैछन् । अर्को सुबिधासम्पन्न क्यूएफएक्स हलमा भने कमेडी फिल्म 'छ एकान छ' मात्र लाग्ने भएको छ ।
विग मुभिजमा कुन फिल्मले कति शो पाएका छन् ? हलका अप्रेशन म्यानेजर दीपक मेहताले तीन नेपाली तथा चार विदेशी फिल्मको शो निर्धारण गर्न बाँकी रहेको बताए । उनले आगामी शुक्रबार हलमा फिल्मको महोत्सव नै लाग्ने बताए । हँसिलो पारामा दीपकले भने- 'यो त एउटा महोत्सव भन्दा कम हुँदैन ।'
एफक्यूवका जेनरल म्यानेजर अरुण रिजालले फिल्मीखबरलाई ठट्टा गर्दै भने- ‘३ नेपाली सहित आउँदो शुक्रबार ६ फिल्म प्रदर्शन हुँदैछन् । प्रदर्शन गर्ने अरू पनि नेपाली फिल्म भए पठाइदिनु होला ।’ उनले धेरै फिल्म रिलिज हुँदा हललाई समेत घाटा पुग्ने भन्दै व्यङग्यको शैलीमा भने- 'नेपाली फिल्म थोरै भएजस्तो छ । अझै २/३ वटा फिल्म भए बिहानदेखि बेलुकासम्म एक एक शो दिन हुन्थ्यो ।'
व्यापार जस्तो जे जस्तो रहेपनि सुबिधा सम्पन्न स्टेशनमा नेपाली फिल्मले प्रदर्शनमा पाएको सहजतालाई भने खुसीको रुपमा लिने कि !
