आगामी पौष २६ गते रिलिज हुन लागेको फिल्म 'बितेका पल'मा अभिनेता बाबु बोगटीको भूमिका के-कस्तो छ ? अहिलेसम्म खुलाईएको छैन । प्रचार प्रसारमा अभिनेत्री केकी अधिकारी र अबिनाश गुरूङलाई मात्र प्राथमिकता दिईेको यस फिल्मको रोमान्टिक गीत रिलिज गरिएको छ जसमा बाबु र केकीलाई फिचर गरिएको छ ।
प्रस्तुत सार्वजनिक गीतबाट अनुमान लगाउन सकिन्छ फिल्म त्रिकोणात्मक प्रेमकथामा आधारित छ । यसअघि केकी र अबिनाशको प्रेममा डुबेका गीत सार्वजनिक भएका थिए जुन निकै रूचाईएको पनि छ । डम्बर नेपालीको शब्द तथा संगीतमा दिपक लिम्बु र जिना रसाईलीको स्वरमा सजिएको प्रस्तुत गीतमा बाबु र केकी एकअर्काको मायामा डुबेका छन् ।
सुरज सुब्बा नाल्बोले निर्देशन गरेको यो फिल्मलाई राजेश घतानी र कृष रिजालले निर्माण गरेका हुन् । फिल्मको अधिकांश सुटिङ भारतको दार्जीलिङमा गरिएको हो । यो फिल्मलाई हरि लामाले खिचेका हुन् भने गीतको करियोग्राफर पेमा लामा हुन् ।
