अन्य अवार्डका कार्यक्रमलाई हेरेर फरक गर्ने भनिएको ६ औं नेफ्टा अवार्ड सम्पन्न हुने समय पनि धेरै नै फरक हुँदै गइरहेको छ । मलेसियामा सम्पन्न गरिने अवार्डको मिति दोस्रो पटक स्थगित भएको छ ।
पहिले नेफ्टा अवार्डलाई कार्तिक २३ गते सम्पन्न गरिने जानकारी थियो । दोस्रो पटकको मिति डिसेम्वर २५ अर्थात क्रिसमस डेमा ६ औं नफ्टा अवार्ड मलेसियामा सम्पन्न हुनेछैन । यद्पी अवार्डको नयाँ मिति तोक्न र व्यवस्थापनको अनुगमन गर्न नेफ्टा टोली पुस ६ गते शनिबार मलेसिया तर्फ उडेको छ । टोलीमा जुरी सदस्य सुनिल थापा, नेपाल चलचित्र प्राविधिक संघका अध्यक्ष मनोज केसी, संघका उपाध्यक्ष प्रकाश महरा र सदस्य शंकर छन् ।
अवार्डमा प्राविधिक संघसँग सहकार्य गर्ने निर्माता सुवास गिरी मलेसियामै छन् । अध्यक्ष मनोज केसीले अवार्डको तेस्रो मिति चाँडै नै तय गरिने बताएका छन् । अवार्डको मिति सर्दै जाँदा फिल्म क्षेत्रमा नेफ्टा अवार्ड त हुन्छ ? भन्ने प्रश्न गर्न थालेका छन् । अध्यक्ष मनोज केसीले भने टाउकोले टेकेरै भएपनि मलेसियामा अवार्डलाई सम्पन्न गर्ने दाबी गर्दै आएका छन् ।
