भनिन्छ नि, गीत संगीतको भाषा हुँदैन । फिल्म 'बितेका पल'मा समावेश गीत 'जब साँझ पर्छ... ' बोलको गीतले संगीत र कलाको परिधि फराकिलो हुन्छ भन्ने प्रमाणित गरिदिएको छ । डम्वर नेपालीको शब्द तथा संगीत रहेको उक्त गीतलाई विश्वका विभिन्न शहरमा बस्ने विदेशीले अत्याधिक रुचाएका छन् ।
फिल्मीखबरलाई प्राप्त भिडियोमा नेपाली गीतलाई विदेशीले रमाइलो ढङ्गले गाएका छन् । फिल्मका निर्मात मध्येका एक अमेरिकामा बस्दै आएका कृष रिजालले 'बितेका पल' हेर्न नेपाली मात्र हैन बिदेशी पनि निकै उत्सुक रहेको बताए । बिदेशीको नेपाली फिल्म र गीत संगीत प्रतिको उत्सुकता प्रस्तुत भिडियोमा प्रस्ट झल्किन्छ ।
निर्माता राजेश घतानीका अनुसार गीतको एल्बम विक्रीबाटै ३० लाख नगद हात परिसकेको छ । 'एल्बम विक्रीबाटै अझै ५ लाख रकम उठ्न बाँकी छ', आफ्नो फिल्मको गीत निकै चर्चित भएको भन्दै निर्माता घतानीले दाबी गरे- 'नेपालमा विक्री हुने एल्बमको रकम जोडिएको छैन ।' अमेरिका तथा जर्मनीमा फिल्मको अडियो रिलिज गरिएपनि नेपालमा बिधिबत रूपमा गरिएको छैन । केहि दिनमा एक बिशेष समारोहमा फिल्मको अडियो विमोचन गरिने निर्माता घतानीले जानकारी गराए ।
यही पौष २६ गतेबाट अल नेपाल प्रदर्शनमा आउने फिल्म 'बितेका पल'मा केकी अधिकारी, अभिनाश गुरुङ र बाबु बोगटीको मुख्य अभिनय छ । सत्य प्रेमकथाको फिल्मलाई सुरज सुब्बा नाल्बोले निर्देशन गरेका हुन् ।
