किशोराअवस्थामा देख्ने सपनाहरूलाई मुख्य बिषय बनाएर 'पुन्टे परेड' नामक फिल्म निर्माणको घोषणा गरिएको छ । बुधबार राजधानीमा एक कार्यक्रममा विच पुन्टे हिरो संयम पुरीलाई लिएर 'पुन्टे परेड' निर्माणको घोषणा गरिएको हो ।
'पुन्टे परेड` हरेक मानिसको किशोराअवस्थाको ऐना हो,' फिल्मका निर्देशक सुवास कोईरालाले भने- 'आफ्ना कल्पनालाई यथार्थमा उतार्न किशोरकिशोरीले गर्ने प्रयासलाई फिल्ममा कमेडी तरिकाले प्रस्तुत गरिनेछ ।' निलु डोल्मा शेर्पाको कन्सेप्टलाई शान बस्न्यातले कथाको रूप दिएको 'पुन्टे परेड'लाई हरि महतले निर्माण गर्दैछन् ।
आगामी सोमबारबाट राजधानीमा सुटिङ शुरू गरिने यस फिल्मलाई निर्माणमा क्षेत्र श्रेष्ठ, सन्तोष कुम्बा, जयराम परियार र राजकुमार पटेलले साथ दिंदैछन् । यसै फिल्मबाट नयाँ अनुहार एञ्जिला दाहालले संयम पुरीसँग फिल्ममा सपना देख्नेछिन् । यस्तै फिल्ममा नट्टु शाह, रबिन्द्र खड्का, गीता अधिकारी, स्वेता थापा लगायतको अभिनय रहनेछ । अभिनेत्री प्रियंका कार्कीको बिशेष भूमिका रहने जानकारी गराईयो ।
बाबु थापाले 'पुन्टे परेड'लाई खिच्दैछन् भने संगीत तारा प्रकाश लिम्बु र टेकनन्द लामाको रहनेछ । उज्जवल ढकालले फिल्म सम्पादन गर्नेछन् भने पब्लिसिटी डिजाईन आनन्द महर्जनको हुनेछ ।
