शुक्रबारबाट काठमाडौंको कालिकास्थान स्थित सर्वनाम थिएटरमा जारी ‘तेस्रो अन्तराष्ट्रिय लोक संगीत फिल्म महोत्सव’ आईतबार सकिएको छ । महोत्सवमा नेपाल सहित विभिन्न देशका लोकसंगीत समेटिएका ३२ फिल्म, बृत्तचित्र एवं गीतिदृष्य (म्युजिक भिडियो) प्रदर्शन गरिको थियो ।
सो महोत्सवका लागि सञ्चारकर्मी डब्बु क्षेत्री निर्देशित फिल्म 'राहदानी'को मारूनी गीत पनि चयन भएको थियो । महोत्सवको तेस्रो दिन आईतबारको दोस्रो शोमा मारूनी गीत प्रदर्शन गरियो । नेपाली फिल्ममा मौलिक लोकसंगीत एवं नृत्यले स्थान पाउन छाडेको बेला 'राहदानी'मा पूर्वेली मौलिक लोक नृत्य एवं भाका समेटिएको निर्देशक क्षेत्रीले जानकारी गराए । सोही कारण यो गीतलाई महोत्सवमा चयनसँगै प्रदर्शन गरिएको हो ।
लक्ष्मीप्रसाद ढकालको प्रस्तुति रहेको फिल्म 'राहदानी'को डा. गोबिन्द कुसुमले लेखेको 'साउनको ठुलो झरी...' बोलको यो मारूनीमा बसन्त सापकोटाको सँगीत छ । निशा देशारको स्वरमा रहेको यो मारूनीको नृत्य निर्देशन राजु शाहले गरेका थिए । जसमा राहदानीका प्रमुख कलाकारले नृत्य गरेका छन् । फिल्म राहदानीको रिलिज आउँदो २८ चैतमा गरिने निर्माण पक्षको कथन छ ।
