अनुप बराल निर्देशित नाटक 'कोर्ट मार्सल' शुक्रबारबाट राजधानीमा मञ्चन गरिएको छ । उक्त नाटकमा अभिनेता राजेश हमाल मुख्य भुमिकामा छन् ।
राजधानीको थिएटर भिलेजमा मञ्चन गरिएको उक्त नाटकमा राजेशलाई पहिलो पटक थिएटरको मैदानमा देख्दा अतिथी तथा सञ्चारकर्मी खुसी देखिन्थे । नाटक मञ्चन पश्चात हमालले निकै राम्रो अनुभव पाएको बताए । 'फिल्म र नाटक विचको भिन्नता थाहा पाएँ,' हमालले भने- 'मेरो जीवनको एउटा रमाईलो र खुसीको क्षण बन्यो नाटकको स्टेज ।'
भारतीय लेखक स्वदेश दिपकको 'कोर्ट मार्सल' नाटकको नेपाली रुपान्तरणमा राजेश हमाललाई नाटकमा सैनिक न्यायधिशको भूमिकामा देख्न सकिन्छ । नाटक सेनाको संगठनभित्र हुने जातीय विभेद तथा ठूलो र सानो पदबीच हुने द्वन्दमा आधारित छ । नाटकमा दयाहाङ राई, बीएस राणा, दिया मास्के, कर्मा, सुवास थापा लगायतका कलाकारले अभिनय गरेका छन् ।
