मलेसियामा आयोजना हुने छैटौं नेफ्टा अवार्डको लागि चलचित्र प्राविधिक संघले टप थ्री नोमिनेशन सार्वजनिक गरिएको छ । ३१ विधामा बाँडिने अवार्डमा उत्कृष्ट ५ मनोनयबाट नेफ्टाले उत्कृष्ट छानेको हो ।

मलेसियामा धेरै फिल्मकर्मी लान नसकिने अवस्था रहेकाले प्राबिधिक संघले टप ५ बाट टप ३ निकालेको हो । निकालिएका टप ३ नोमिनेशनमा अधिकांश क्याटगोरीमा नोमिनिज दोहोरिएका छन् । यसमा पनि नेफ्टाले चलाखी अपनाएको बुझ्न सकिन्छ । तर, प्राबिधिक संघका अध्यक्ष मनोज केसीले सम्बन्धित बिधाका उत्कृष्ट फिल्मकर्मीलाई टप थ्रीमा निकालेको बताए । उत्कृष्ट अभिनेत्री, उत्कृष्ट अभिनेता, उत्कृष्ट फिल्म, उत्कृष्ट निर्देशक विधामा भने टप फाईफ नै राखिएको छ ।

३१ विधामा बाँडिने यस अवार्डको नोमिनेशनमा परेका टप थ्री नोमिनिज मध्ये उत्कृष्ट एक एसएमएसको आधारमा छनोट गरिने अध्यक्ष केसीले कार्यक्रममा जानकारी गराए । टफ फाईभमा रहेका अभिनेता र अभिनेत्री मध्येबाट एमएमएसकै आधारमा ‘पपुलर एक्टर अफ द इयर’ पनि घोषणा अध्यक्ष केसीको भनाई छ । अवार्ड कार्यक्रम कात्तिक २३ गते मलेसियामा हुनेछ ।

बर्ष ०६८ देखि बर्ष ०६९ सालको भाद्र महिना सम्म प्रदर्शनमा आएका फिल्महरूलाई निर्णायक भरत शाक्य, विजयरत्न तुलाधार, जावेद शाह, प्रभाकर शर्मा र सुनिल थापाले अवलोकन गरेर टप फाईभ लिस्ट तयार परेका हुन् । नेफ्टा अवार्डको मलेसिया प्रायोजन सुवास इन्टरनेटमेन्टले गरेको हो ।

नेफ्टाले यस पटक मलेशियामा बरिष्ठ अभिनेता, निर्देशक तथा निर्माता निर शाहलाई 'अभिनय शिरोमणी'को उपाधी दिएर बिशेष सम्मान गर्ने भएको छ । आजैको कार्यक्रममा नेफ्टाका अध्यक्ष केसीले निर शाहलाई 'अभिनय शिरोमणी'को उपाधी दिएपनि सम्मान भने अवार्ड समारोहका बिशेष प्रस्तुतीका माझ गर्ने तयारी गरिएको अध्यक्ष केसीको भनाई थियो । नेफ्टाले यसअघि राजेश हमाललाई महानायकको उपाधी दिएको थियो ।

यता अभिनेता शाहले आफूलाई दिईएको उपाधी भारी लागेपनि सम्मान दिएकोमा प्राबिधिक संघलाई धन्यवाद दिए । झण्डै ४६ बर्ष फिल्म क्षेत्रमा विताएका शाह पहिलो पुस्ताका अभिनेता हुन् । अभिनेता शाहले राजेश हमालले जस्तै आगामी हुने नेफ्टाका कुनै पनि अवार्ड समारोहमा आफू प्रतिष्पर्धी नहुने बताए । उनले यो उपाधी पाउँदै जीवनकालै खुसीको क्षण समेत रहेको बताएका थिए ।