दशैं घरको ढोकाबाट पस्ने क्रममा छ । जमाना रेडीमेटको छ, त्यसकारण दशैंमा गर्नुपर्ने कामको अभिनेत्री अरूणिमा लम्साललाई कुनै चिन्ता छैन । बालकोट माईतीमा दशैं मनाउने अभिनेत्री लम्सालसँग फिल्मीखबरले छोटो गफ गरेको छ :-
कुन कुराले दशैंको महसुश गराउँछ ?
बिहानीको चिसो हावा र पारिजात फुलको मिठो वास्नाले दशैंको महशुस गराउँछ । बजारमा देखिने भिडले पनि दशै आएको संकेत गर्छ ।
दशैंको कुन पक्ष मन पर्छ ?
पहिला स्कूलमा छुट्टी पाउन पनि दशैं कुर्नु पर्थ्यो । नयाँ लुगा लगाउने, खसी काट्ने हुँदा दशैं एकदम रमाइलो लाग्थ्यो । अहिले चाहि दशैंको अवसरमा हुने भेटघाट नै विशेष लाग्छ ।
कुन पक्ष राम्रो लाग्दैन ?
बढी जाँड, रक्सी खाने र तास खेल्ने पक्ष मन पर्दैन ।
दशैंमा दिइने दक्षिणाको आश कत्तिको लाग्छ ?
सानो हुँदा त दक्षिणाको एकदमै आश लाग्थ्यो । पैसा पनि टन्नै कमाइन्थ्यो । तर, अहिले त पैसा कमाउनु भन्दा पनि खर्च चाहि हुन्छ । आफु भन्दा सानोलाई टिका लगाएर उल्टै दक्षिणा दिनुपर्छ ।
अहिलेसम्म पाएको मध्ये धेरै दक्षिणा कति छ ?
एक जना दाजु पर्नेले मलाई टिका लगाएर दश डलर दिनु भएको थियो । डलरलाई मैंले सुरक्षित राखेको छु ।
बिहे भएको पहिलो वर्षको दशैं कत्तिको उत्साहित भएको थियो ?
बिहेको पहिलो दशैं उत्साहित त थियो नै साथमा अलि भिन्न पनि लागेको थियो । जहिल्यै माइतीमा टिका लगाएको बानी घरमा टिका लगाउँदा अनौठो लागेको थियो । कतिखेर माइत जाउँ जस्तो लागेको थियो ।
दशैंमा खानको कत्तिको सौखिन हुनुहुन्छ ?
एकदमै सौखिन छु । दशैंमा खसीको मासु धेरै खाईन्छ । एक दुई छाक सागपात र दही दुध खाएपनि धेरै जसो खसीको मासु नै खाइन्छ ।
