महोत्तरीको बर्दिवासमा रहेको जानकी चलचित्र मन्दिर विहिवार देखि संचालनमा आएको छ । झण्डै ५ महिना लगाएर स्तरन्नोती गरिएको जानकी हल विहिवार देखि संचालनमा आएको हो ।

करिव ३० लाख रुपैँया खर्च गरेर स्तरोन्नती गरिएको जानकी हलको उद्घाटन नायक जीवन लुईटेल र निर्देशक विकास आचार्यले गरे । हलको उद्घाटन गर्दै दुवै जनाले जानकी हल संचालनमा आएकोमा खुशी ब्यक्त गरे । जानकी हलले फिल्म रिदम चलाएको हुनाले उद्घाटन पनि रिदमका निर्देशक र नायकबाट गराएको हो । उद्घाटन शोमा निर्देशक आचार्य र नायक लुईटेल दर्शकसँगै बसेर रिदम हेरेका थिए । हल उद्घाटनका लागि निर्देशक आचार्य र नायक लुईटेल बुधवार नै बर्दिवास आएका थिए ।

बर्दिवासका पत्रकारसँग जिवनले के के भने ??

जानकी हलको उद्घाटन गर्न बर्दिवास आइपुगेका नायक जीवन लुईटेलले स्थानीय संचारकर्मीहरुसँग झण्डै आधा घण्टा कुरा गरे । संचारकर्मीसँग भएको लामो छलफलमा उनले आफु एडल्ट फिल्म कहिल्यै पनि नखेल्ने घोषणा गरे । हाल सम्म सेक्स केन्द्रित फिल्म नखेलेको बताउँदै उनले आगामी दिनमा पनि त्यस्ता फिल्म नखेल्ने बताए ।

दर्शकले आफुलाई लभ स्टोरी फिल्ममा नै हेर्न रुचाएकाले आफु दर्शकको चाहना विपरित सेक्समा केन्द्रित फिल्म खेल्न नसक्ने जीवनको भनाई थियो । धेरैजसो निर्माताले आफुलाई लभ स्टोरी फिल्ममा नै अफर गर्ने गरेको बताउँदै उनले भने- 'म दर्शकको चाहना मारेर सेक्स ओरेन्टीयड फिल्म खेल्न चाहन्न । बरु म एक्सन प्रधान फिल्म खेल्छु ।'

त्यस्तै जीवनले गणेश लामा र पर्शुराम वस्नेत डन नभएर असल मान्छे भएको बताएका छन् । जीवनको डनसँग निकटताको विषयमा संचारमाध्यमा आएको समाचारको विषयमा स्थानीय संचारकर्मीले राखेको जिज्ञासामा उनले गणेश लामा र पर्शुराम वस्नेत राजनीतिज्ञ र मिडियाको लागि डन भए पनि आफ्नो लागि असल मित्र रहेको बताए । पटक पटक जेल परेर छुटेका पर्शुरामलाई जीवनले विराटनगरको साथी रागणेश लामालाई काठमाण्डौँको साथी भने ।

देश नै राजनीतिमा अडिएको हुनाले सवैजनाले राजनीतिमा चासो राख्नु पर्ने बताएका जीवनले आफु भने अहिल्यै नै राजनीतिमा नलाग्ने बताए । नेपाली फिल्म कलाकार राजनीतिमा लाग्ने क्रम बढिरहेको प्रसंगमा संचारकर्मीले राखेको जिज्ञासामा जीवनले राष्ट्रको गहना मानिने कलाकारिता पेशा छोडेर फोहोरी खेल मानिने राजनीतिमा लाग्ने सोच अहिले आफुमा नरहेको स्पष्ट पारे ।

त्यस्तै जीवनले आफु नेपाली क्रिकेटको मात्र नभएर फुटबलको पनि फ्यान भएको बताए । नेपाली क्रिकेटमा पारस खड्का र शक्ति गौचन आफुलाई मनपर्ने खेलाडी बताउँदै आएका जीवनले फुटबलमा आफु सागर थापा र भरत खवासको फ्यान भएको बताए । फिल्म खेले बापत आफुले लिने पारिश्रमिक बारे बताउन नचाहेका उनले आफु बलिउड अभिनेता संजय दत्तको फ्यान भएको खुलेरै बताए । संजयलाई भेट्न आफु विराटनगरबाट मुम्बई सम्म पुगेको खिस्सा समेत उनले सुनाउन भ्याए ।

जीवनसँगै जानकी हलको उद्घाटन गर्न बर्दिवास आइपुगेका रिदम निर्देशक विकास आचार्यले भने लभ स्टोरी फिल्म मात्रै निर्माण निर्देशन गर्नुको कारण बारे स्थानीय संचारकर्मीलाई स्पष्टीकरण दिनुपर्यो । संचारकर्मी माझ घेरिएका उनले आफु एकदमै धेरै लभ गर्ने र माया मन पराउने मान्छे भएको हुनाले लभ स्टोरी फिल्म मात्र बनाएको स्पष्टिकरण दिए । 'फेरी नाइ न भन्नु ल' फिल्म बनाउने तयारीमा रहेको बताउँदै उनले लभ स्टोरी फिल्म हिट हुने देखेर लभ स्टोरी फिल्म मात्र बनाएको उनले बताए ।