नवनिर्वाचित नेपाल चलचित्र निर्माता संघको कार्यसमितीले तयार पारेको पाइरेसी अनुगमन तथा नियन्त्रण समितिले आफ्नो काम शुरू गरेको छ । निर्माता करण क्रेजीको संयोजकत्वमा गठित उक्त समितिले आईतवार कमलपोखरी परिसरमा रहेका दुई सिडी तथा भिसिडी पसलबाट नेपाली फिल्मको सिडी तथा भिसिडी पाईरेसी गर्ने तीन जना व्यक्तिलाई समातेको छ ।
पाइरेसी अनुगमन तथा नियन्त्रण समिति र कमलपोखरीमा रहेको प्रहरी प्रभागको एक टोलीले श्रीराम जयसवाल र सुनिता यादवलाई पाइरेसी गर्दै गरेको अवस्थामा पक्राउ गरेको पक्राउ गरेको हो । पक्राउ पर्नेहरूबाट छापामारेको टोलीले सीपीयू, मेमोरी कार्ड, मोनिटर सहित नेपाली फिल्ममा सिडी तथा भिसिडी बरामद गरेको जनाएको छ ।
'मेमोरी कार्डमा फिल्म कपि गर्दै गरेको अवस्थामा हामीले पक्रेका हौं,' संयोजक करण क्रेजीले बताए । पक्राउ परेका यि दुई व्यक्तिलाई प्रतिलिपी अधिकार ऐन वमोजिम कारबाही हुने बताइएको छ । संयोजक क्रेजीले धरासायी नेपाली फिल्मको बजारमा फिल्मको पाईरेसीले अझै धरासायी बनाएको हुनाले यो कार्य रोक्न आफ्नो टोली डटेर लाग्ने बताए । 'हामी अब ठाउँ-ठाउँमा छापा मार्नेछौं,' क्रेजीले भने ।
