नेपाल चलचित्र विकास बोर्डले धरानमा आयोजना गर्ने भनेर निर्णय गरेको राष्ट्रिय चलचित्र महोत्सव जेष्ठको १५ १६ र १७ गते आयोजना हुने भएको छ । धरानमा शनिबार आयोजना गरिएको सर्वदलिय छलफलबाट महोत्सवको मितिको घोषणा गरिएको हो ।

 

 

महोत्सवको तयारीका लागि विभिन्न उपसमितीहरु समेत गठन गरिएको छ । धरान नगरपालिकाको स्थानीय संयोजन एवं धरानमै बिगत २५ वर्ष देखि नाट्य क्षेत्रमा कार्य गरिरहेको अनाम नाट्य जमातको ब्यास्थापनमा यो महोत्सवको आयोजना हुन लागेको हो । अनाम नाट्य जमातका अध्यक्ष बिनोद तखाछेको मूल संयोजकत्वमा विभिन्न १४ ओटा उपसमितीहरु गठन गरिएको हो । उपसमितीहरुमा प्रचार प्रसार ,सरसफाई, आर्थिक, चलचित्र प्रदर्शन, अन्तरक्रिया, आवास तथा यातायात लगायतका रहेका छन् ।

 

प्रत्येक उपसमितीहरुमा संयोजकको साथै सदस्यहरु पनि चुनिएको छ जसले भोलिबाट नै आफ्नो कार्यलाइ द्रुत गतिमा आगाडी बढाउने निर्णय समेत भएको छ । गठन गरिएको उपसमितीहरुमा धरानका हरेक क्षेत्रका व्यक्तिवहरुको सहभागिता रहेको छ । शनिबारको भेलामा विकास बोर्डको तर्फबाट सदस्य निलहरि काफ्ले र प्रशासन अधिकृत अनुपम निरौलाको उपस्थ्ति रहेको थियो भने धरानका राजनीतिकर्मी, बुद्धिजीवी, समाजसेवी, उद्योगी, कलाकर्मी, हल संचालक लगायतले समेत महोत्सव बारे आफ्नो विचार राखेका थिए । 

 

तीन दिने महोत्सवको उद्घाटन कार्यक्रम स्थानीय डिपोट स्कुलको प्रांगणमा गरिने छ जहाँ झन्डै १०० जना नायक नायिका र अन्य चलचित्रकर्मीलाई प्रस्तुत गर्ने तयारी गरिएको छ । उद्घाटन पुर्व कलाकार सहितको झाकी एवं नगर परिक्रमाको कार्यक्रम समेत राखिएको छ । १६ र १७ गते गणेश टाकिज र शिव सिनेमामा बोर्डले छानेको ४ फिल्म प्रदर्शन गरिने छ भने अन्तिम दिन फिल्म निर्माण सम्बन्धि कार्यशाला समेत गरिने छ । त्यस्तै चित्रकला एवं निबन्ध प्रतियोगितासंगै धरान आसपासमा रमणीय लोकेसनको भ्रमण समेत गराईने छ ।