सञ्चार मन्त्री राजकिशोर यादवले माग पुरा गर्ने लिखित सहमति गरेको २० दिन नाघिसक्दा पनि कार्यान्यवन नभएको भन्दै फिल्मकर्मीहरु कडा आन्दोलनमा उत्रिएका छन् ।

राष्ट्रिय चलचित्र संरक्षण मञ्चको नेतृत्वमा यो आन्दोलनले पहिलो पाईला स्वरुप चलचित्र बिकास बोर्डमा अनिश्चिकालिन ताला लगाउने निर्णय गरिएको छ । ८ वटा प्रमुख संस्थाको समर्थनमा मञ्चले मंगलबार रिपोर्टस क्ल्वमा पत्रकार सम्मेलन गरी यो आन्दोलन घोषणा गरेको हो ।

पत्रकार सम्मेलनमा आन्दोलनको नेतृत्व गरिरहेको मञ्चका संयोजक नीर शाहले अत्यन्त पिडादायी अवस्थाको बाबजुत यो कदम चाल्न बाध्य रहेको बताए । उनले मन्त्रीले गरेको लिखित प्रतिबद्धतालाई हेलचेक्राईको संज्ञा दिदै उनको आस्वाशन प्रति घोर भत्र्सना पनि गरे । फिल्मकर्मी प्रति सरकारले देखाएको वेवास्ता प्रति ब्यग्य प्रहार गर्दै उनले मृत प्राय भईसकेको चलचित्र क्षेत्रलाई जिउदै गाड्ने प्रयास भए पनि कंकाल पनि निस्किएर आन्दोलनको उदेश्य हासिल गरि छाड्ने बताए ।

आन्दोलनलाई चलचित्र निर्माता संघ, निर्देशक समाज, चलचित्र संघ, कलाकार संघ, प्राविधिक संघ, द्धन्द कलाकार संघ, नृत्यकार संघ र महिला चलचित्र कर्मी मञ्चका प्रमुखहरुले लिखित समर्थन जनाएका छन् जसले पत्रकार सम्मेलनमा आन्दोलनलाई निर्णायक बनाउने प्रतिबद्धता जनाएका छन् । बोर्डमा ताला भोली बिहान कार्यालय समय देखि लगाईनेछ ।