फिल्मीखबर डिजिटल फिल्म अवार्ड हात पारेकै दिन अर्थात् आईतवार बेलुका नायिका रेखा थापा सुटुक्क कतार उडिन् । अहिले उनी आफू अभिनित पछिल्लो रिलिज फिल्म लंकाको कतारको दोहामा प्रोमोशन गर्नमा व्यस्त छिन् ।
फिल्मका निर्देशक श्याम भट्टराईले फिल्मीखबरलाई दिएको जानकारी अनुसार भोली शुक्रबार बिहान ११ बजे र दिउँसो २ बजे दोहाको दोहा सिनेमा हलमा लंका देखाईंदै छ । फिल्मको उक्त बिशेष शोमा नायिका रेखा थापा दर्शकसँगै बसेर फिल्म हेर्ने छिन् । रेखा आँफै नै पब्लिसिटीमा खटिरहेको निर्देशक भट्टराईले बताए । फिल्म प्रदर्शनको आयोजना भने महेन्द्र खड्काले गरेका हुन् ।
मंसिर १ गते नेपालमा रिलिज भएर राम्रै व्यापार गरेको लंकामा रेखाको साथमा किशोर खतिवडा, नन्दु श्रीवास्तव, नागेन्द्र रिजाल, ध्रुव कोईराला, ममता प्रधान, अनु गायक, आयुष्मा कार्की, सिताष्मा थापा लगायतले अभिनय गरेका छन् । चण्डिका फिल्म्सको व्यानरमा श्याम भट्टराईको साथमा ओम प्रकाश अग्रवाल, मालती शाह र संजय कुटुले संयुक्त लगानी गरेको यो फिल्मले नेपालबाट नै लगानी रिकभर गरेको युनिटले बताएको छ ।
