पाठेघरको क्यान्सरबाट पिडित अभिनेत्री मनिषा कोईरालाको न्यूयोर्कमा शल्यक्रिया सम्पन्न भएको छ । नेपाली समय अनुसार मंगलबार बिहान सवा दश बजे करिब ६ घण्टा लगाएर न्यूयोर्कको म्यानहाटन स्थित मेमोरियल स्लोन केटरिङ क्यान्सर सेन्टरमा शल्यक्रिया सम्पन्न गरिएको हो ।
पाठेघर क्यान्सर बिशेषज्ञ डेनिस चीले मनिषाको पाठेघरको शल्यक्रिया गरेका हुन् । शल्यक्रिया सम्पन्न भए पनि परिवारले मनिषालाई भेट्न पाएका छैनन् । मनीषाका बुबा प्रकाश, आमा सुष्मा र भाई सिद्धार्थ सहित केहि आफन्तहरू अस्पतालमा रहेको बताईएको छ । मनिषाको स्वास्थ्य अवस्थाको बारेमा अहिले केहि खुलाईएको छैन तर पनि चिकित्सकले परिवारलाई चिन्ता नगर्न आग्रह गरेका छन् ।
फुड प्वाइजनको आशंकामा शुरूमा काठमाण्डौको नर्भिक अस्पतालमा भर्ना भएकी मनिषालाई क्यान्सर भएको देखेपछि मुम्बईको जसलोक अस्पताल पुर्याईएको थियो । जलसोकमा केहि दिन राखेपछि शल्यक्रियाका लागि कोईराला परिवारले अमेरिका लगेको हो ।
