शनिबार हुने चलचित्र कलाकार संघको निर्वाचनका लागि सम्पूर्ण तयारी पूरा भएको छ । बिहान दश बजे देखि कमलादी स्थित प्रज्ञा प्रतिष्ठानमा सुरु हुने संघको विशेष साधारण सभा लगत्तै नयाँ नेतृत्वका लागि चुनाव हुनेछ ।

निर्वाचनमा १५ पदका लागि ३२ सदस्यको भिडन्त हुने छ । कोषाध्यक्ष र सह-कोषाध्यक्षमा आकाश खवास र निशा अधिकारी निर्विरोध चयन भईसकेका छन् । निर्वाचनका लागि ३ सय ८१ मत पत्र  तयार पारिएको छ । अध्यक्षमा जित्न एक उम्मेदवारले १ सय ९१ न्यूनतम मत ल्याउन जरुरी छ । अध्यक्षका लागि नवल खड्का र सविन बाँस्तोलको उम्मेदवारी  छ ।

हाल सम्म संघको भएको जति पनि निर्वाचन थिए ती निर्वाचन श्रृङखला भन्दा यो पटक तिब्र राजनीति भएको छ जसकारण कसले जित्न सक्छ भन्ने पूर्वानुमानहरु दावीका साथ कसैले भन्न सकेका छैनन्  । यस्तै निर्वाचन मिती नजिकिएपछि उम्मेदवार प्रस्तावक र समर्थको बिषयले संघमा विवाद उत्पन्न भएको छ । कलाकार संघका अध्यक्ष रमेश बुढाथोकी र पूर्व अध्यक्ष कृष्ण मल्लले नैतिकता बिर्सिएर अध्यक्षका लागि नवल खड्कालाई समर्थन किन जनाए भन्ने प्रश्न सवै तिर छ ।

विवादमा पर्न नचाहँदै एक फिल्मकर्मीले भने, 'अध्यक्ष सवै सदस्यका लागि बराबार हो त्यसैले नवलको उम्मेदवारीमा समर्थन र प्रस्ताव गर्नु नैतिकताको हिसावले आपत्तिजनक छ ।' त्यति मात्र हैन सवै भन्दा ठूलो बहस सदस्य पदमा उठेकाहरुको बिषयले बनाएको छ । किनकी सदस्यमा उठेका अधिकांश उम्मेदवारहरुले पनि अर्का उम्मेदवारको प्रस्तावक र समर्थक भएर देखा पर्दा यो बिषय सहि हो या गलत भन्ने बिषयले बहस सृजना गरेको हो ।