असोज २७ गते हुने चलचित्र कलाकार संघको निर्वाचनका लागि नवल खड्काले अध्यक्ष पदको लागि आफ्नो उम्मेदवारी घोषणा गरेका छन् । हाल महासचिव पद सम्हालिरहेका खड्काले बुधबार ब्यक्तिगत रुपमा पत्रकार सम्मेलन गर्दै उम्मेदवारी घोषणा गरेका हुन् ।
पेशागत हकहितका लागि स्थापना भएको कलाकार संघ गौरव पूर्ण ईतिहास रहेको भन्दै खड्काले ईतिहासको सम्मानमा विरासतलाई अगाडी बढाउनका लागि अध्यक्ष पदमा आफ्नो उम्मेदवारी घोषणा गरेको जनाएका छन् । उम्मेवादरी घोषणा संगै उनले पन्ध्र बुँदे प्रतिज्ञा पत्र पनि सार्वजनिक गरेका छन् । तीन बर्षे कार्यकालका लागि अध्यक्षमा आफ्नो विजय भए उनले रु. एक लाख बराबरको कलाकारहरुको विमा योजना ल्याउने प्रतिज्ञा गरेका छन् ।
यस्तै एम्बुलेन्स सञ्चालन, राष्ट्रिय र अर्न्तराष्ट्रिय स्तरमा कलाकारहरुको संगठन विस्तार, कलाकारको सम्मान प्रक्रियालाई निरन्तरता, संघ र्न्तगतको छुट्टै पुरस्कारको स्थापना, संघका लागि जग्गा प्राप्त सहित भवन निर्माण र होस्टेलको ब्यवस्थाको साथमा चलचित्र प्रज्ञा प्रतिष्ठान स्थापनामा पहल गर्दे कलाकारहरुको आत्मनिर्भरतामा टेवा पुर्याउन चलचित्र सहकारी संस्थाको स्थापनामा आफ्नो ध्यान केन्द्रित रहने उनको प्रतिज्ञा पत्रमा उल्लेख गरिएको छ ।
निर्वाचन अघिको १८ दिन अघि उम्मेदवारी घोषणा गरेका नवल अध्यक्षका लागि बलिया दाबेदार मानिएका छन् । उनी बाहेक औपचारिक रुपमा अन्य कसैले आफ्नो उम्मेदवारी घोषण गरेको छैनन् यध्यपी बाहिर चलेको हल्ला अनुसार कलाकार सबिन बाँस्तोलाले पनि अध्यक्ष पदका लागि आफ्नो उम्मेदवारी घोषणा गर्ने तयारी गरिरहेका छन् । यस्तै उपाध्यक्ष पदका लागि भने लय संग्रौला, सानु ताम्राकार र शैलेजा पाण्डेको नाम बाहिरिएको छ ।
उता महासचिव पदमा उठ्न घनश्याम खतिवडा र रामकेशर बोगटीले तयारी गरिरहेका छन् भने सचिव पदमा उठ्ने तयारीमा उत्तम केसी, राज कुमार शाह र श्रीराम पुडासैनीको नाम बाहिरिएको छ । यस्तै कोषध्यक्ष पदको लागि भने आकाश खवासको नाम बाहिरिएको छ । निर्वाचनका लागि कलाकार संघले निर्देशक राजेन्द्र शलभलाई प्रमुख निर्वाचन अधिकृतको रुपमा तोकेको छ भने अर्का निर्देशक सुमन दाहाल र अधिवक्ता शम्भु निरौला निर्वाचन अधिकृतिको रुपमा रहने छन् । निर्वाचन मण्डलीले १६ गते देखि आफ्नो कार्य सुरु गर्ने छ ।
