२०८१ सालमा ‘बुलाकी’बाट लेखन विधामा राष्ट्रिय अवार्ड जितेका राजबहादुर सानेको लेखन तथा निर्देशनमा बन्न लागेको नयाँ फिल्म ‘गंगा रानी’मा मुख्य अभिनेत्रीको टुंगो लागेको छ । मंगलबार निर्माताले अभिनेत्री वर्षा सिवाकोटीलाई फिल्ममा अनुबन्धित गरेका हुन् । यस फिल्ममा वर्षा रानी पात्रको भूमिकामा देखिने जनाइएको छ । 

कमलप्रसाद शर्मा निर्माता रहेको फिल्ममा वर्षा अनुबन्ध भएसँगै अन्य भूमिकाका लागि कास्टिङ कलको आह्वान गरिएको छ । मुख्य पात्रका लागि २० देखि ४० वर्ष उमेरका चार पुरुष र १८ देखि ३५ वर्ष उमेरका चार महिला अडिसनमार्फत छनोट गरिने निर्माता शर्माले जानकारी दिए । उनका अनुसार इच्छुकले अभिनयका भिडियो र सिकेका प्रमाणहरू पठाउन सक्नेछन् ।

आहा फिल्म्सको प्रस्तुतिमा बन्ने यस फिल्मको छायांकन भदौ दोस्रो साताबाट सुरु हुने जनाइएको छ । फिल्मले धनाड्य युवती र संगीत क्षेत्रमा संघर्षरत युवकबीचको मर्मस्पर्शी प्रेमकथा प्रस्तुत गर्नेछ । निर्देशक सानेका अनुसार दर्शकले नेपाली फिल्ममा हेर्दै आएको प्रेमकथाभन्दा ‘गंगा रानी’मा फरक पाउने दाबी गरेका छन् । 

निर्देशक सानेले यसअघि आधा दर्जनभन्दा बढी फिल्मको निर्देशन गरिसकेका छन् । ‘पाठशाला’बाट निर्देशकीय यात्रा सुरु गरेका उनको पछिल्लो रिलिज फिल्म ‘सिटामोल’ हो । ‘द रिटर्न हिरो’, ‘लाटी’, ‘वृन्दावन’, ‘वीरांगना’, ‘डोली’, ‘गुड फ्रेन्ड’ र ‘सिल्ली फो’ जस्ता फिल्म समेत बनाइसकेका उनको नयाँ फिल्म ‘लज्जावती’ प्रदर्शनको पर्खाइमा छ ।