Nepal's No.1 Filmy Web Magazine
‘लाखे’ फेम्ड निर्देशक साम्राट बस्नेतको निर्देशन तथा दीपक मनाङ्गेको निर्माणमा बन्न लागेको फिल्म ‘कङ्गारु’मा हास्य अभिनेता केदार घिमिरे ‘माग्ने बुढा’पछि अर्को मुख्य भूमिकामा अभिनेता अर्पण थापाको प्रवेश भएको छ । थापा र फिल्मको निर्माण पक्षबीच मंगलबार काठमाडौंमा कागजी सम्झौता भएको हो । अर्पणले निर्देशक बस्नेतसँग यसअघि फिल्म ‘लाखे’मा पनि काम गरेका थिए ।
अभिनेत्री तथा नेतृ रेखा थापा आगामी फागुनमा आमा बन्दैछिन् । तर, उनी पहिलो सन्तानलाई जन्म दिन अमेरिका पुगेकी छन् । श्रीमान् बलराम शाही ठकुरीको परिवार उतै बस्ने गरेको र त्यहीँ पहिलो सन्तान जन्माउने श्रीमानको इच्छाअनुरुप रेखा अमेरिका पुगेकी हुन् । अब उनी सन्तानको जन्मपछि नेपाल फर्किनेछिन् । सन्तान अमेरिकामा जन्मिँदा त्यहीँको नागरिक हुने प्रावधान छ ।
अभिनेता पल शाहले यतिबेला लगातार फिल्म सम्झौता गरिरहेका छन् । दुई हप्ताअघि फिल्म ‘मायावी’को छायांकन भ्याएका उनी आगामी माघ पहिलो साताबाट फिल्म ‘पूजार सार्की’मा काम गर्दैछन् । यस वर्षको अन्त्यतिर भने उनी फिल्म ‘अवतार’मा काम गर्ने तयारीमा छन् । यसबीच, उनले सोमबार केवल तामाङको निर्माण र निर्देशन रहने फिल्म ‘मायाका रंगहरु’ सम्झौता गरेका छन् ।
‘नाईं नभन्नू ल ४’बाट एकसाथ डेब्यू गरेका पल शाह र वर्षा राउतले दोस्रोपटक फिल्ममा सहकार्य गर्ने भएका छन् । ‘भैरे’ निर्देशक एभरेष्ट सूर्य बोहाराको नयाँ फिल्म ‘अवतार’मा उनीहरुको जोडी बाँधिन लागेको हो । पलले सोमबार आफ्नो इन्स्टाग्राम स्टोरीमा सेअर गरेको फिल्मको स्क्रिप्टको तस्वीरमा वर्षाको नाम पनि उल्लेख छ । र, वर्षाले पनि उक्त स्टोरी इन्स्टामा सेअर गरेकी छन् ।
नेपाली फिल्ममा नयाँ अनुहारको प्रवेश बढिरहेको समयमा यही मंसिर २९ गतेबाट प्रदर्शनमा आउन लागेको फिल्म ‘दुई कदम’बाट अभिनेतामा इओन लिम्बु र अभिनेत्रीमा सिमोन गिरीले डेब्यू गरेका छन् । फिल्मको कथा नै उनीहरुमा केन्द्रित छ । पहिलो फिल्म भएकाले दुवैमा दर्शकको प्रतिक्रिया कस्तो आउँछ भन्ने कुराले राम्रै डर पैदा गरिरहेको छ । तर पनि उनीहरु उत्साहित देखिन्छन् ।
यही शुक्रबार अर्थात् पुष २९ गतेबाट प्रदर्शनमा आउन लागेको आशुतोषध्वज कार्कीद्वारा निर्देशित फिल्म ‘जम्प’को आइतबार साँझ काठमाडौंस्थित बिग मुभिजमा आयोजना भएको प्रिमियरमा सकारात्मक प्रतिक्रिया मिलेको छ । फिल्मकर्मी तथा समीक्षकले फरक शैलीको कथावाचनको प्रशंसा गर्दै फरक हिसाबले बनेका फिल्म मन पराउने दर्शकलाई विशेष रुचिकर हुनसक्ने बताएका छन् ।
