Nepal's No.1 Filmy Web Magazine
२०७९ सालमा प्रदर्शन भएको फिल्म ‘छड्के २’का निर्माता प्रशान्त गिरीले नयाँ फिल्मको रुपमा ‘जवाफ’ निर्माणको घोषणा गरेका छन् । उनले बुधबार एआई (आर्टिफिसियल इन्टेलिजेन्स)बाट तयार पारिएको थिम पोस्टर सार्वजनिक गर्दै फिल्म घोषणा गरेका हुन् । पोस्टरले फिल्म एक्सन-थ्रिलर जनरामा बन्ने संकेत गर्छ ।
सुदीप भुपाल सिंहले सात वर्षपछि निर्देशनमा कमब्याक गरेको फिल्म ‘श्री बुकुरो : द होम कलिङ’को प्रदर्शन मिति घोषणा बिनै बुधबार दोस्रो टिजर सार्वजनिक गरिएको छ । डेढ मिनेट लम्बाइको टिजरले फिल्मको कथावस्तुबारे प्रकाश पार्छ । अभिनेत्री लक्ष्मी गिरीले गम्भीर भावमा वाचन गरेको कविताको अंशबाट सुरु भएको टिजरमा एउटा परिवारको कथालाई प्रस्तुत गरिएको छ ।
हिमाल न्यौपानेको निर्देशनमा बन्न लागेको फिल्म ‘जनै हराएको बाहुन’मा कलाकारको लाइनअप रोचक बनिरहेको छ । कीर्तिमानी फिल्म ‘पूर्ण बहादुरको सारङ्गी’ फेम्ड अभिनेता विजय बरालको मुख्य भूमिका रहने फिल्ममा अब दुई अभिनेत्रीको प्रवेश भएको छ । उनीहरु हुन्, केकी अधिकारी र मिरुना मगर । फिल्मका निर्माताले गत सोमबार दुवै अभिनेत्रीसँग लिखित सम्झौता गरेका हुन् ।
चर्चा र विवादको पर्याय मानिएकी अभिनेत्री पूजा शर्माको फिल्मी करिअर २०७९ सालयता सुखद छैन । ३ वर्षमा ‘सम्झना बिर्सना’, ‘सम्हालिन्छ कहिले मन’, ‘उपहार’, ‘दान्भी’ र ‘रावायण’ गरी उनका ५ वटा फिल्म फ्लप भए । ‘रावायण’ उनी आफैंले निर्माण गरेको फिल्म थियो । यसबाट उनले ठूलो घाटा बेहोर्नुपर्यो । फिल्मको श्रृंखलाबद्ध असफलताले यतिबेला उनी संकटको अवस्थामा छिन् ।
कुनै पनि फिल्म सफल भएपछि त्यसको सिक्वेल वा सिरिज बनाउने विश्वव्यापी ‘ट्रेन्ड’ छ । तर, प्रिक्वेल (पहिलो भाग) निर्माण भएका फिल्म भने उतिधेरै छैनन् । नेपालमा पनि प्रिक्वेल फिल्म बनेका छैनन् । आगामी चैत २९ गतेबाट प्रदर्शनमा आउन लागेको फिल्म ‘पिताम्बर’को भने प्रिक्वेल बनाउने योजनामा निर्देशक कृषा चौलागाईं छिन् । त्यसका लागि आधाउधी छायांकन पनि भैसकेको छ ।
पछिल्लो समय अभिनेत्री ऋचा शर्माको फिल्ममा भूमिका बदलिएको देखिन्छ । उनी एकपछि अर्को फिल्ममा आमाको भूमिकामा देखिरहेकी छन् । पछिल्लो रिलिज फिल्म ‘सारंग’ होस् वा आगामी चैत १ गतेबाट प्रदर्शनमा आउन लागेको फिल्म ‘राजागंज’, उनी आमाको भूमिकामा छिन् । नयाँ फिल्म ‘बलिदान’मा पनि उनले अभिनेता समीर भट्टकी आमाको भूमिकामा अभिनय गरेकी छन् ।
