Nepal's No.1 Filmy Web Magazine

स्वर्गीय अभिनेता श्रीकृष्ण श्रेष्ठको चर्चित फिल्म ‘कहाँ भेटिएला’को शीर्षकमा फेरि फिल्म निर्माण हुने भएको छ । १६ वर्षअघि यो फिल्म स्वर्गीय निर्देशक शिव रेग्मीले बनाएका थिए । अब मिलन तामाङले फिल्मको निर्देशन गर्नेछन् । उनी हाल प्रदर्शनरत फिल्म ‘माइतीघर’का निर्देशक हुन् । मंगलबार थिम पोस्टर सार्वजनिक गर्दै ‘कहाँ भेटिएला’को निर्माण घोषणा गरिएको हो । 

चर्चित फ्रेन्चाइज फिल्म ‘कबड्डी’को अब पाँचौँ श्रृंखला निर्माण हुँदैछ । चौथो भागलाई नै अन्तिम श्रृंखला भनिए पनि निर्माण पक्षले नयाँ कथामा ‘कबड्डी ५’ बनाउन लागेको हो । सोमबारबाट यो फिल्मको छायांकन सुरू गरिएको छ । मुस्ताङ जिल्लाको प्रसिद्ध धार्मिक तीर्थस्थल मुक्तिनाथ मन्दिरमा स्क्रिप्ट र क्यामेरा पूजा गरेपछि लार्जुङ बस्तीमा पहिलो दृश्य खिचियो । 

आगामी कात्तिक ६ गतेबाट प्रदर्शनमा आउन लागेको फिल्म ‘सोल्टिनी’को ट्रेलर सार्वजनिक गरिएको छ । सोमबार काठमाडौंमा एक कार्यक्रमको आयोजना गदै दर्शकमाझ ल्याइएको ट्रेलरले अन्तरजातीय प्रेममा आउने पारिवारिक र सामाजिक अवरोधको कथा पेश गरेको छ । ट्रेलरको केन्द्रमा फिल्मका मुख्य जोडी प्रकाश सपूत र परीक्षा लिम्बू छन् ।

२० वर्षअघिको ‘कल्ट क्लासिक’ फिल्म ‘मुगलान’को शीर्षकमा फेरि एकपटक फिल्म निर्माण भएको छ । सोमबार यस फिल्मको फर्स्टलुक पोस्टर सार्वजनिक गर्दै आगामी पुष १० गतलाई प्रदर्शन मिति घोषणा गरिएको छ । यो मितिमा अभिनेता प्रदीप खड्का अभिनीत फिल्म ‘एक्लो’ पनि प्रदर्शन हुने चर्चा छ । यद्यपि, यसको प्रदर्शन मिति घोषणा भइसकेको छैन । 

कन्नड फिल्म ‘कान्तारा २’ले भारतीय बक्स अफिसमा आँधी ल्याएको छ । १२५ करोड भारुमा बनेको यो फिल्मले भारतमा मात्रै ४ सय करोडको आँकडा पार परेको छ । त्यसमा हिन्दी भर्सनको योगदान १३१ करोड छ, जुन १० दिनको कमाइ हो । फिल्मको विश्वव्यापी कमाइ भने ५ सय करोडभन्दा बढी रहेको ट्रेड ट्रयाकिङ अनलाइन स्याक्निल्कले जनाएको छ । 

पछिल्लो समय फिल्मको भाव दर्शकसम्म पुर्‍याउन कविता वाचनको प्रयोग बढ्दै गएको छ । ‘भूठान’ र ‘रियाल रिङ्गेट’ जस्ता फिल्मले यो अभ्यास गरिसकेको अवस्थामा कात्तिक १४ गते प्रदर्शनमा आउने फिल्म ‘परान’को टिजर पनि काव्यात्मक शैलीमा तयार पारिएको छ । फिल्मका मुख्य अभिनेता नीर शाहको जन्मदिनको अवसरमा आइतबार टिजर सार्वजनिक गरिएको हो ।