एनएफडिसी राष्ट्रिय चलचित्र पुरस्कारमा चर्चित कलाकारहरुले बिभिन्न प्रस्तुति दिने भएका छन् । अवार्डलाई आकर्षक बनाउनका लागि फिल्मका चर्चित गीतहरूमा आ–आफ्नो प्रस्तुति दिनका लागि कलाकारहरु अभ्यासमा जुटिसकेका छन् ।
दुई दर्जन कलाकारहरुको प्रस्तुति रहने अवार्ड समारोह स्वर्गीय नायक श्रीकृष्ण श्रेष्ठ प्रति समर्पित सांगीतिक प्रस्तुतिबाट शुरु हुने भएको छ । जसका लागि कोरियोग्राफर कविराज गहतराजले कलाकारहरुलाई नृत्य सिकाइरहेका छन् । श्रीकृष्ण श्रेष्ठ अभिनित हिट गीतहरुमा दिलिप रायमाझी, केकी अधिकारी, एन्नी कुवँर, सुजता कोइराला, रिश्ता बस्नेतलगायतका कलाकारहरूले प्रस्तुति दिनेछन् ।
यस्तै आठ वर्ष पछि अभिनेता रमेश उप्रेतीले पनि आफ्नो प्रस्तुति दिने भएका छन् । रमेशले अभिनेत्री करिष्मा मानन्धरसँग जोडी बाँधेर नृत्य गर्नेछन् । रमेशले आफु ८ वर्षपछि नेपाली स्टेजमा पर्फम गर्न लागेको भन्दै नृत्यलाई अब्बल बनाउन कुनै कसुर बाँकी नराख्ने बताए ।
कलाकारहरुलाई नृत्य सिकाइरहेका कविराज गहतराज यस वर्षको प्रस्तुति थप आकर्षक हुने बताउँछन् । गएको वर्षपनि कोरियोग्राफि गरेका कवि यस वर्ष गत वर्ष भन्दा नयाँ र नौलो नृत्य पस्किने तयारीमा छन् । एनएफडिसी राष्ट्रय चलचित्र पुरस्कार २०७० भाद्र २१ गते आयोजना हुँदैछ ।
