आइतबार बिहानैबाट श्रीकृष्णको निधन भएको खबर सार्वजनिक भए पछि फिल्म हेर्न धरानको गणेश टाकिजमा आएका दर्शकहरु समेत भावुक देखिए । धेरैले उनको निधनको खबर सुन्दा स्तब्ध भएको र अझै पनि विश्वास गर्न गार्हो भएको प्रतिर्किया दिए । श्रीकृष्णले अभिनय गरेका धेरै फिल्महरुले मन छोएको बताउदै दर्शकहरु फिल्ममा उनको प्रत्येक दृश्य आउँदा भावुक बनेको देखियो । फिल्म सबै कोणबाट उत्कृष्ट बनेको बताउँदै एक होनहार इमान्दार अभिनेतालाई गुमाउनु पर्दा दु:ख लागेको अधिकांश दर्शकले बताए ।

 

पूर्वका हलहरुमा यातायात संघले आयोजना गरेको बन्दको बावजुद पनि फिल्मले राम्रो व्यापार गरिरहेको छ । बिशेषत धरानमा फिल्मले शुक्रबार र शनिबार राम्रो कलेक्सन गर्न सफल भएको छ । फिल्मले पहिलो दिन पचास प्रतिशत अकुपेन्सि कायम गरेको थियो भने शनिबार र आइतबार धरानमा प्रत्येक शो हाउसफुल भएको थियो । फिल्मको माउथ पब्लिसिटीले दर्शक हलमा तानिरहेको बेला उनको निधनको खबर सुनेर उनको अन्तिम फिल्म हेर्न समेत हलमा आएका थिए ।