हनिमुन मनाउन हिंडेको श्रीकृष्ण श्रेष्ठ र श्वेता खड्काको जोडी निर्धारित समयमा नेपाल नआएपछि फिल्म ‘कोहिनूर’ को प्रदर्शन मितिलाई लिएर विभिन्न अड्कल बाजी सुरु हुन थालेका छन् । फिल्मको लगानीकर्ता अनि मुख्य हिरो र हिरोइन नै नेपाल नभएपछि ‘कोहिनूर’ को प्रदर्शन मिति सर्ने धेरैको अड्कल छ ।
वितरक सुनिल मानन्धर अनि निर्देशक आकाश अधिकारीले फिल्म ‘कोहिनूर’ को प्रदर्शन मिति नसर्नेमा विश्वस्त पारे । वितरक मानन्धरले साउन २३ नै ‘कोहिनूर’ को अन्तिम प्रदर्शन मिति रहेको बताए । उनले जे भएपनि साउन २३ बाट फिल्म अघि आउने या पछि हट्ने सम्झौता नभएको बताए ।
निर्देशक आकाश अधिकारीले भने यदि श्रीकृष्ण र श्वेता नेपाल आउन अझै ढिलाइ भए उनीहरुको पारिवारिक सदस्य साउन २३ मै फिल्म प्रदर्शन गर्न तयार भएको बताए । निर्देशक अधिकारीले भने, ‘उहाँहरुको पारिवारले फिल्म प्रचार प्रसारमा सहयोग गरिरहेको छ । उहाँहरु चाँडै नै नेपाल फर्कदैं हुनुहुन्छ ।’
श्रीकृष्ण र श्वेता यसै साता नेपाल फर्कने निर्देशक अधिकारी जानकारी दिए । सुख्खा खोकीले च्यापेपछि श्रीकृष्णको यतिबेला बिदेशमा उपचार भैरहेको बताईएको छ । असार २६ मा विवाह बन्धनमा बाँधिएका श्रीकृष्ण र श्वेता बिहे लगत्तै हनिमुन अनि फिल्म प्रर्दशनको व्यवस्थापन गर्न भारत निस्किएका थिए ।