निर्माता हरि महत थुनामा परेका छन् । चक्रपथ महानगरीय प्रहरी कार्यालयले साउन ४ गते आइतबार २५ घण्टे अनुन्धानको लागि थुनामा राखेको हो ।

‘वाइड इभेन्ट नेपाल टुर’ आयोजना गरेर सहभागी कलाकारलाई पारिश्रमिक नदिएपछि ठगी गरेको भन्दै हरिशरण महत थुनामा परेका हुन् । उक्त टुरमा सहभागी भई पारिश्रमिक नपाएका लोक गायक प्रकाश कटुवालले रकम तिर्ने सहमती नगरे महतलाई ठगीको मुद्धा चलाई जेल चलान गर्ने बताए । उनले भने, ‘पारिश्रमिक रकम तिर्ने सम्भावना निकै कम छ । ठगीको निवेदन दर्ता भैसकेको छ । अब मुद्धा चलाउँछौं ।’

पेपर सम्झौता गरिएका १४ जना कलाकारको झन्डै १२ लाख रकम निर्माता महतले तिर्न बाँकी छ । देशका विभिन्न १५ शहरमा चलेको उक्त टुरमा अभिनेत्री सुष्मा कार्की, गायकहरु सुगम पोखरेल, रुपक डोटेल, सम्भोज मल्ल, युवराज चौलागाइँ, प्रकाश कटुवाल, कमल क्षेत्री, गायिकाहरु आकाक्षां बस्याल, बुनु राई मानन्धर, सम्झना लामिछाने मगर लगायत मौखिक सम्झौता गरिएका अन्य ३ जना वाइड इभेन्ट टुरमा सहभागी थिए ।