‘प्रेमीले कुटेपछि रुदै नाचिन् सुष्मा’ भन्ने खबरको अभिनेत्री सुष्मा कार्की र उनका प्रेमी निरनले खण्डन गरेकी छिन् । नघटेको घटनालाई गलत रुपले मिडियामा प्रचार भएपछि यसले आफुलाई दुः खी बनाएको सुष्मा र निरनले फिल्मीखबरलाई बताए ।
सुष्माले भनिन्, ‘हामीबिच केही भएको छैन । निरनले मलाई कुट्यो भन्ने समाचार गलत हो ।’ वाइड इभेन्टले आयोजन गरेको देशव्यापी साँस्कृतिक यात्रामा सुष्मा र उनका प्रेमी निरन सहभागी थिए । धरानमा भएको कार्यक्रममा सुष्मा र निरन बिच झगडा भएपछि प्रहरी गुहार्नु पर्यो भन्ने समाचार बाहिरिएको थियो ।
यसबारे निरनले भने, ‘सुष्माको खुट्टा मर्किएको थियो । नाच्नुअघि मैले के भयो ? भनेर मात्रै उसलाई सोधेको थिएँ । कुरा यति मात्रै हो ।’ त्यस्तै साँस्कृतिक कार्यक्रमको लागि सिक्किम जाँदै गरेकी सुष्माले थपिन्, ‘खोई किन यसरी समाचार आइरहेको छ ? खुट्टा मर्किएपछि धरानको कार्यक्रममा मलाई नाच्न गाह्रो भएको थियो । निरनले मलाई कुट्यो भन्ने कुरा गलत हो ।’
सुष्मा र निरन मिलेर केही महिना पहिले ठमेलमा रेष्टुरेन्ट सञ्चालनमा ल्याएका थिए । फाइदाको व्यापार नभएपछि रेष्टुरेन्ट छोडिसकेको सुष्मा र निरनले बताए । यी अहिले नयाँ व्यावसाय गर्ने योजनामा छन् ।
