अभिनेत्री रेखा थापाको निर्माण, निर्देशन एवं अभिनय रहेको फिल्म ‘हिम्मतवाली’ ले सोलो रिलिजको सम्भावना गुमाउने अवस्था छ । असोज १५ गते रेखाको ‘हिम्मतवाली’सँगै ‘एउटा साथी’ फिल्म प्रदर्शनमा आउने भएको छ ।

वितरकले नलिए आफैंले वितरणको जिम्मा लिएर ‘एउटा साथी’ निर्माण युनिट फुलपातीमा ‘हिम्मतवाली’सँग भिड्न कस्सिएको छ । निर्देशक एवं फिल्म निर्माणमा ब्यानर साझेदारी गरेका लक्ष्मण सुवेदीले भने, ‘जुधाउन भन्दा पनि फुलपातीमा हामीले फिल्म प्रदर्शन गर्न लागेका हौं । कुन मितिमा चाहिं फिल्म नजुधेको छ र ?’

लक्ष्मणले आफ्नो फिल्ममा दम रहेकाले दर्शकले मन पराउने समेत विश्वास व्यक्त गरे । पूर्ण प्रेम कथाको फिल्म निर्देशन गरेका उनले थपे, ‘रेखाजीको स्टारडम होला तर हाम्रो फिल्ममा दम छ ।’ उनले ‘हिम्मतवाली’ र ‘एउटा साथी’ लाई प्रतिस्पर्धात्मक शैलीमा तुलना नगर्न आग्रह गरे ।

सञ्चारकर्मी सुवेदीले पहिलो पटक फिल्म निर्देशन हात हालेका हुन् । सलोन बस्नेत, रिस्ता बस्नेत, जोन तामाङ, अनु शाह लगायतको अभिनय रहेको फिल्म हाल पोष्ट प्रोडक्सनमा छ । फिल्मलाई रामचन्द्र खनालले निर्माण गरेका हुन् ।