‘मुखौटा’ रिलिज सँगै अभिनेता अर्पण थापाको परिचय निर्देशक बन्दैछ । आफ्नो पहिलो फिल्मले दर्शकको हलसम्म ध्यान तान्ने अर्पणको विश्वासको छ । अभिनय समेत रहेको अर्पणको ‘मुखौटा’ लाई इनिसियल हान्ने फिल्मको रुपमा हेरिएको छ ।
‘मुखौटा’को व्यापार कस्तो होला ? यही जेठ ३० गते पछि थाहा हुनेछ । फिल्म रिलिजको संघारमा अभिनेता एवं निर्देशक अर्पण थापाले फिल्मीखबरसँग एउटा रमाइलो किस्सा साटे । फिल्म ‘मुखौटा’ प्रदर्शनको तयारीमा रहेका अर्पणले फिल्मीखबरसँग भने, ‘मलाई नाच्न आउँदैन ।’ साँच्चै नाच्न आउँदैन या नाच्न नआएको बाहाना अर्पणले गरे ? उनी स्पष्टीकरण दिनतर्फ लागे, ‘हो मलाई साँच्चै नाच्न आउँदैन । खै किन नाच्न जानिएन आफैंलाई थाहा छैन ।’
नाच्ने क्लास लिनु भएन ? भन्ने प्रश्नमा अर्पणले भने, ‘पहिला नाच्ने कक्षा गइएन । अब जानु पर्ला ।’ अर्पणले आफुलाई नाच्न नआएकै कारण फिल्म खेल्ने प्रस्ताव कम आएको हुन सक्ने समेत चुहाए । उनले हाँस्दै भने, ‘नाच्न नजान्ने भएपछि नाच्ने फिल्मको प्रस्ताव नै आएको छैन । फेरी मलाई डाँडामा गएर नाच्ने फिल्ममा काम गर्न त्यती मन पनि लाग्दैन ।’ ‘सिकसिटी’, ‘ब्याच नम्बर १६’, ‘बधशाला’, ‘छड्के’, ‘मौन’ र ‘मुखौटा’ सम्म आइपुग्दा एउटा पनि फिल्ममा अर्पणले नाच्नु परेको छैन ।
