करिब दुई दशक अघि 'सम्बन्ध' भन्ने चलचित्रमा मामा भान्जा भएर पहिलो पटक अभिनय गर्दा अभिनेता शिव श्रेष्ठ र सुनिल थापाले एकले अर्कालाई साथीको रूपमा सम्बोधन गर्थे तर समयको परिवर्तन संगै यि दुईको सम्बन्ध अब साथीमा मात्र सिमित रहेन । किन कि यहि आउदो मंसिर १६ गते औपचारिक रूपमै शिव र सुनिल सम्धीको रूपले पनि परिचित हुदै छन् ।
मंसिर १६ गते शिवले छोरा शक्तिको लगनगाठो सुनिलको श्रीमतीको फूपूको नातिनी (नाता केलाउदा सुनिलको छोरी पर्ने) अन्ना सिहँसंग राजकीय शैलीमा कस्दैछन् । अष्ट्रेलियामा रहेका शिवका छोरा शक्तिले क्षेत्रपाटीकी रैथाने तर हाल अष्ट्रेलिया सिटिजनसिप होल्डर अन्नसंग प्रेम पश्चात अरेन्ज म्यारिज गर्न लागेका हुन् । जुन विवाहको तयारीमा शिव अहिले निकै ब्यस्त हुन थालेका छन् ।
फिल्मीखबरसंग कुरा गर्दै शिवले भने, 'बिहेको लागि ब्यस्त छु त्यसैले अहिले अरू कुरामा त्यति फुर्सद छैन ।' सहकर्मी मात्र नभई पारिवारिक सम्बन्ध जोडिन लागेपछी गत मंगलबार सुनिल र शिवले भुवन निवासमा एकले अर्कालाई सम्धी भनेर सम्बोधन गरेका थिए । तर पछिल्लो समय सेडुल जुध्ने गरी करिब आधा दर्जन फिल्ममा साईन गरिसकेका अभिनेता थापा सुटिङका कारण बैबाहिक समारोहमा उपस्थित हुन नसक्ने लक्षण देखिरहेको बताउछन् ।
सुनिल र शिवले करिब एक दर्जन चलचित्रमा अभिनय गरेका छन् । यि दुईले पछिल्लो समय सोभित बस्नेतको निर्देशनमा बनेको चलचित्र राजमा संगै अभिनय गरेका थिए तर दर्शकमाझ तुलसी घिमिरे निर्देशित चलचित्र चिनोबाट यि दुईको जोडी थप चर्चामा आएको थियो ।
