सेलिब्रेटीहरु कस्ता सवारी साधनमा यात्रा गर्छन् भन्ने धेरैलाई चासो हुन्छ । अहिले नेपाली फिल्मका प्रायः अभिनेता/अभिनेत्रीसँग चार पांग्रे सवारी छ । एक करोडभन्दा बढी मुल्यका गाडीमा समेत नेपाली कलाकारहरु हुँइकन थालेका छन् । दीपकराज गिरी, नम्रता श्रेष्ठ, श्वेता खड्कालगायत महंगो गाडीमा यात्रा गर्नेमा पर्छन् । कति कलाकार भने गाडीभन्दा बाइकका सौखिन छन् ।
पर्दामा नकारात्मक भूमिकामा देखिँदै आएका अभिनेता अनुप विक्रम गाडीमा यात्रा गर्न खासै रुचाउँदैनन् । उनीसँग चार पांग्रे गाडी मुल्य बराबरका बाइक छन् । उनले नेपालमा कमै व्यक्तिले चढ्ने विश्वकै सर्वाधिक चर्चित बाइक डुकाटी समेत किनेका छन् । यो बाइक किन्ने सपना पूरा गर्न उनलाई ८ वर्ष लागेको थियो । उनले दुई वर्षअघि २४ लाखमा यो बाइक खरिद गरेका थिए ।
अभिनेता शाहीसँग ६ लाख मुल्य बराबरको बुलेट बाइक पनि छ । लकडाउनको समयमा उनले ६ लाखभन्दा बढी मुल्य पर्ने अर्को बाइक ‘क्रशफायर एचजे २५०’ खरिद गरेका छन् । कोरोनाका कारण लकडाउन भएपछि फुर्सदिला भएका उनी अहिले हप्तामा एकदिन साथीहरुसँग बाइक राइडिङमा निस्कने गरेका छन् । उनी विशेषगरि अफरोड राइडिङमा जान मन पराउँछन् ।
शनिवार उनले इन्स्टाग्राममा बाइक राइडिङका केही तस्विर शेयर गर्दै ‘हाम्रो विकेन्ड’ भनेर लेखेका छन् । महंगा बाइकमा हुँइकन रुचाउने अनुप नेपाली फिल्मका ह्यान्डसम भिलेनको रुपमा चिनिन्छन् । उनलाई भिलेनको भूमिकामा दर्शकले विशेष रुचाउने गरेका छन् । तर, उनले केही समययता नयाँ फिल्म साइन गरेका छैनन् । अब आफू फिल्म छनौटमा चुजी हुने उनको भनाई छ ।
