काठमाडौं । बालेन शाह नेतृत्वको सरकार बनेसँगै विदेशी फिल्मको नेपाल प्रदर्शनमा कडाइ गरिएको छ । मित्रराष्ट्रसँगको सम्बन्धमा असर पर्न सक्ने फिल्मलाई केन्द्रीय जाँच समितिले प्रदर्शन अनुमति नै दिन छाडेको छ । त्यसको पहिलो मारमा फिल्म ‘उड्ता तीर’ परेको थियो । फिल्मले पाकिस्तानलाई खराब रूपमा चित्रण गरेका कारण नेपालमा प्रदर्शन नै हुन पाएन ।

अब धेरैको चासो नेपाली अभिनेता अनुप विक्रम शाही अभिनीत भारतीय फिल्म ‘मातृभूमि’लाई लिएर छ । किनकि, यो फिल्मको कथावस्तु चीनलक्षित छ । सन् २०२० मा लद्दाखको गलवान उपत्यकामा भारत र चीनका सैनिकबीच भएको झडपलाई फिल्मको मुख्य विषयवस्तु बनाइएको छ । मंगलबार सार्वजनिक ट्रेलरले पनि यसबारे स्पष्ट पारिसकेको छ । 

४ डिसेम्बर (१८ मंसिर)मा रिलिज हुन लागेको फिल्मको कथावस्तुलाई लिएर चीनले लामो समयदेखि आपत्ति जनाउँदै आएको छ । यही कारण फिल्मको रिलिजमा समेत ढिलाइ भयो । भारतको रक्षा मन्त्रालयले केही दृश्य परिवर्तन गर्न निर्देशन दिएपछि फिल्मको केही भाग पुनः छायांकन गरिएको थियो । यसपछि मात्र रक्षा मन्त्रालयले फिल्मलाई ‘एनओसी’ दिएको छ ।

तर, फिल्मको कथा चीनसँग सम्बन्धित भएकाले नेपालमा भने रिलिजको सम्भावना न्यून देखिन्छ । निर्माण, प्रदर्शन तथा वितरण ऐन २०२६ को दफा ८(३)मा मित्रराष्ट्रसँगको सुसम्बन्धमा विरोध पार्ने किसिमका फिल्मलाई चलचित्र जाँच समितिले प्रदर्शन गर्न अनुमति नदिने उल्लेख छ । ‘मातृभूमि’को हकमा यही दफा आकर्षित हुन सक्ने देखिन्छ ।

तर, सामाजिक सञ्जालमा भने ‘मातृभूमि’लाई नेपालमा रिलिज हुन दिनुपर्ने आवाज उठ्न थालेको छ । त्यसको मुख्य कारण हुन्, अनुप । नेपाली अभिनेताले बलिउड स्टार सलमान खानसँग अभिनय गरेको फिल्म नेपाली दर्शकले हेर्न पाउनुपर्ने धेरैको तर्क छ । यस्तो अवस्थामा चलचित्र जाँच समितिले फिल्मको प्रदर्शनबारे कस्तो निर्णय लिन्छ, त्यो भने चासोको विषय बनेको छ ।

अपूर्व लखियाको निर्देशनमा बनेको फिल्ममा अनुपले चिनियाँ जनमुक्ति सेनाका मेजरको भूमिकामा अभिनय गरेका छन् । मंगलबार सार्वजनिक ट्रेलरमा उनलाई प्राथमिकताका साथ प्रस्तुत गरिएको छ । एक दृश्यमा उनी सलमानसँग लडाइँ गरिरहेका समेत देखिन्छन् । ट्रेलरमा उनले पाएको स्क्रिन स्पेस हेर्दा फिल्ममा उनको भूमिका प्रभावशाली रहेको अनुमान गर्न सकिन्छ ।