बलिउडको सुपरहिट फिल्मको कुरा गर्दा एसएस राजामौली निर्देशित ‘बाहुबली’ सिरिजको नाम सबैभन्दा अगाडि आउँछ । यो फिल्मको हरेक एक चरित्रलाई दर्शकले निकै रुचाएका थिए । यसमध्ये कटप्पाको भूमिका साउथका अभिनेता सत्यराजले निभाएका थिए । तर, हालै यो खबर बाहिरियो कि कटप्पाको भूमिकाका लागि बलिउड अभिनेता सञ्जय दत्त पहिलो रोजाई थिए ।
निर्देशक राजामौलीले कटप्पाको रोलका लागि सञ्जयसँग सम्पर्क गरेका थिए । तर, त्यो समय उनी जेलमा सजाय काटिरहेका थिए । यसकारण उनले यो फिल्म गर्न सकेनन् । पछि उक्त रोल सत्यराजलाई अफर गरिएको थियो । उनले कटप्पाको चरित्रलाई अमर बनाउन कुनै कसर छाडेका छैनन् । त्यसो त सञ्जय दत्तलाई फिल्ममा नेगेटिभ चरित्रमा दर्शकले निकै रुचाउने गरेका छन् ।
‘बाहुबली’ मा शिवगामीको चरित्र अभिनेत्री राम्या कृष्णनले निर्वाह गरेकी थिइन् । यो चरित्र पनि पहिला श्रीदेवीलाई अफर गरिएको थियो । तर, अभिनेता प्रभासभन्दा पनि महँगो पारिश्रमिक माग गरेपछि निर्देशक राजामौलीले उनको ठाउँमा राम्यालाई अनुबन्ध गरेका थिए । उनले शिवगामीको भूमिकालाई जीवन्त बनाएकी थिइन् । पछि यो फिल्म छाडेकोमा श्रीदेवी पछुताएकी थिइन् ।
