कोरोना भाइरसको त्राससँगै नेपाली फिल्म क्षेत्रमा कुनै पनि प्रकारका गतिविधि भएका छैनन् । लकडाउनका कारण ३ महिनादेखि सिनेमा हल बन्द हुँदा प्रदर्शनको तयारीमा रहेका फिल्म कम्प्यूटरको हार्डडिक्समै थन्किएका छन् । फ्लोरमा जाने सुरसारमा रहेका र फ्लोरमा रहेका फिल्म अनिश्चितकालका लागि रोकिएका छन् । यो अवस्था अझै कहिलेसम्म हुने हो निश्चित छैन ।
कोरोनाका कारण सरकारले जारी गरेको लकडाउन अन्त्य भएको एक वर्षसम्म फिल्म क्षेत्र पुनः चलायमान हुन समय लाग्नेछ । जसको असर निर्माण सम्पन्न भैसकेका फिल्मका निर्मातालाई पर्ने देखिन्छ । बलिउडमा निर्माण पूरा भैसकेका फिल्महरु ओटीटी प्ल्याटफर्ममा रिलिज हुने क्रम बढिरहँदा नेपाली मेकरहरु पनि फिल्म रिलिजका लागि हलको विकल्प खोज्न थालेका छन् ।
फिल्म ‘कोपिला’ हलमा प्रदर्शन नभइ डिस होममा रिलिज भैसकेको छ । अभिनेता सविन श्रेष्ठ स्टारर फिल्म ‘हिरो रिर्टन्स’ पनि हलभन्दा अगाडि डिस होसमा रिलिज हुँदैछ । अब, विवेक घिमिरे निर्देशित फिल्म ‘चिनी कम रंग कडा’ लाई पनि ओटीटी प्ल्याटफर्ममा रिलिज गर्ने तयारी निर्माण टिमले गरेको छ । निर्माण सम्पन्न भैसके यो फिल्म हलमा प्रदर्शन भएको छैन ।
यसबीच, निर्माण टिमले फिल्मको लिरिकल भिडियो सार्वजनिक गरेको छ । ‘सुगन्धि चक्षुले’ बोलको गीतमा मानव सुवेदी र सुशील सुवेदीको शब्द रचना रहेको छ भने मानवकै संगीत तथा स्वर समावेश छ । गणेशदेव पाण्डेको निर्माण तथा लेखन रहेको यो फिल्ममा फिल्ममा मानव सुवेदी, सुशील सिटौला, अनु थापा, सुर्य थापा, रबिन जंग थापालगायतका कलाकारहरुको अभिनय छ ।
गीत हेर्नुहोस् :-
