अर्को वर्षको दशैंको फूलपातीलाई प्रदर्शन मिति घोषणा गर्दै फ्लोरमा निस्किएको अभिनेता अनमोल केसी र अभिनेत्री सुहाना थापा स्टारर फिल्म ‘ए मेरो हजुर ४’ को छायांकन रोकिएको छ । विश्वभर फैलिएको कोरोना भाइरसको प्रभावका कारण केही दिनका लागि फिल्मको छायांकन रोकिएको अभिनेत्री तथा निर्देशक झरना थापाले फेसबुकमा स्टाटस लेखेर जानकारी दिएकी छन् ।
(1)(1).jpg)
‘मानव जातीलाई नै चुनौती बनिरहेको कोरोना संक्रमणबाट बच्न, सतर्कता अपनाउन हामी सबै एकजुट हुनैपर्छ । यसबाट कलाकार, प्राविधिकहरुमा पर्न गएको असुविधाप्रति हामी सजग छौं । आफ्नो स्वस्थ र जीवनभन्दा ठूलो केही हुन सक्दैन । हामी छिट्टै फेरि पहिले जस्तै सहज जीवनशैलीमा हुनेछौं,’ उनले लेखेकी छन् । झरना थापाको ‘ए मेरो हजुर ४’ तेस्रो निर्देशन हो ।
पोखरामा छायांकन सकेर हालै निर्माण टिम राजधानी फर्किएको थियो । ४० प्रतिशत छायांकन पूरा भैसकेको फिल्मको बिहीवारसम्म पाटनमा छायांकन भैरहेको थियो । बुधवार सरकारले सिनेमा हल बन्द गर्न र २५ जनाभन्दा बढी भेला नहुन निर्देशन दिएपछि ‘ए मेरो हजुर ४’ को छायांकन रोकिएको हो । किनकि, फिल्मको सुटिङमा ४० जनाभन्दा बढी व्यक्ति खटिएका थिए ।
फिल्ममा अनमोल र सुहानासँगै सलोन बस्नेत, सरोज खनाललगायतका कलाकारहरुको अभिनय छ । फिल्ममा अभिनेता अनमोलले पालेको कुकुर कोकोको पनि अभिनय रहेको छ । सञ्जय लामाले फिल्म खिच्ने जिम्मेवारी पाएका छन् । नेपाल छायांकन पूरा भएपछि यूरोप र ओमानमा फिल्मको गीत खिचिँदैछ । फिल्मको निर्माण लागत डेढ करोड नाघ्ने अनुमान गरिएको छ ।
सरकारले कोरोनाको जोखिम न्यूनिकरणका लागि आउँदो बैशाख १८ गतेसम्म देशभरका सिनेमा हलहरु बन्द गर्ने निर्णय गरेसँगै नेपाली फिल्म क्षेत्रमा यसको ठूलो प्रभाव परेको छ । बैशाख दोस्रो हप्तासम्म प्रदर्शनको तयारीमा रहेका सम्पूर्ण फिल्मको प्रदर्शन अस्तव्यस्त भएको छ । डेढ महिना हल बन्द हुने भएपछि नेपाली फिल्म क्षेत्रलाई ५० करोडको क्षती हुने अनुमान गरिएको छ ।
