नेपाली फिल्मका लागि ब्रान्ड नाम हो, रेखा थापा । १८ वर्ष अगाडिको फिल्म ‘हिरो’ बाट अभिनेत्रीको रुपमा डेब्यू गरेकी उनले एक समय नेपाली फिल्ममा आफ्नो दबदबा कायम गरेकी थिइन् । अभिनेत्रीले पनि फिल्म आफ्नो काँधमा बोकेर हिँड्न सक्छ भन्ने मान्यता स्थापित गरेकी उनले लभस्टोरीकी लभर गर्लदेखि एक्सन फिल्मकी एक्सन लेडीसम्मको भूमिका निभाइसकेकी छन् ।
.JPG)
झण्डै २ दशक लामो फिल्म करिअरमा २ सयभन्दा बढी फिल्ममा अभिनय गरिसकेकी उनले आफूलाई अभिनेत्रीको रुपमा मात्र सीमित राखेकी छैनन् । उनले गायिका, निर्मात्री, निर्देशकको रुपमा पनि आफ्नो परिचय बनाइसकेकी छन् । एक समय एकसेएक हिट फिल्म दिएकी उनी अहिले भने एक हिट फिल्मको खोजीमा छिन् । उनी अभिनीत पछिल्ला कुनै फिल्म सफल छैनन् ।
अहिले अभिनेत्री रेखा थापा आउँदो बैशाखबाट छायांकन सुरु हुन लागेको नयाँ फिल्मको तयारी व्यस्त छिन् । अघिल्ला फिल्मझैँ यसमा पनि उनी एक्सन अवतारमा प्रस्तुत हुँदैछिन् । फिल्ममा उनले दयाहाङ राई र सौगात मल्लसँग स्क्रिन साझेदार गर्दैछिन् । सविर श्रेष्ठले फिल्मको निर्देशन गर्दैछन् । यसपछि उनी रेनशा वान्तवा राईले निर्देशन गर्ने फिल्मको तयारीमा जुट्नेछिन् ।
अभिनेत्री रेखाको अर्को वर्षका लागि पहिलो फिल्म ‘हिरो रिटर्न्स’ बैशाखको २६ गतेबाट प्रदर्शनमा आउँदैछ । ‘अन्दाज’ बाट आफूले नै अभिनेताको रुपमा भित्राएको सविन श्रेष्ठको आग्रह नकार्न नसकेर उनले यो फिल्म गरेकी थिइन् । बुधवार सार्वजनिक भएको फिल्मको ट्रेलरमा सविन र रेखा दुवै एक्सन अवतारमा देखिएका छन् । फिल्मलाई आशिष भेटवालले निर्देशन गरेका हुन् ।
फिल्मको ट्रेलर सार्वजनिक कार्यक्रममा रेखाले ‘हिरो रिटर्न्स’ प्रदर्शनमा आउँदै गर्दा आफ्नो डेब्यू फिल्म ‘हिरो’ को स्मरण गरिन् । ‘हिरो’ लाई कसरी सम्झनुहुन्छ ? भन्ने पत्रकारको प्रश्नमा उनले भनिन्, ‘यो फिल्मलाई सम्झन मसँग शब्द नै छैन । मेरो मनमा टाँसिएको फिल्म हो ‘हिरो’ । तर, यो फिल्मले मलाई हिरो बन भनिरहेको रहेछ भन्ने कुरा चाहिँ यदाकदा मेरो दिमागमा आउँछ ।’
.JPG)
कार्यक्रममा उनले नेपाली फिल्म नचलिरहेको प्रशंग झिक्दै सञ्चारकर्मीलाई कहिले काहिँ निःशुल्क फिल्मको प्रचार गर्न आग्रह गरिन् । उनको यही भनाईमा टेकेर पत्रकारले प्रश्न गरे- ‘तपाईंले चाहिँ कति फिल्म निःशुल्क गर्नुभयो ?’ उनले जवाफ फर्काउन समय लगाइनन् । ‘मैले थुप्रै फिल्म पैसा नलिइ गरेको छु । ‘हिरो रिटर्न्स’ मा पनि नलिएको जस्तै हो,’ रेखाले मुस्कुराउँदै भनिन् ।
