यही शुक्रवारबाट प्रदर्शनमा आउन लागेको यस वर्षको प्रतिक्षीत फिल्म ‘आमा’ र ‘छक्का पञ्जा’ टिमले तत्कालीन चलचित्र विकास बोर्डका अध्यक्ष तथा कलाकार स्वर्गीय केशव भट्टराईको परिवारलाई आर्थिक सहयोग गरेको छ । ‘आमा’ निर्मात्री शर्मिला पाण्डेले आइतवार राजधानीमा एक कार्यक्रमका बीच स्व. भट्टराईकी श्रीमतीलाई एक लाख एक हजार सहयोग हस्तान्तरण गरिन् ।
कलाकार केशव भट्टराइको निधनपछि उनको परिवार आर्थिक समस्यामा रहेको खबर सुनेपछि फिल्मको तर्फबाट आफूले सहयोग गरेको निर्मात्री पाण्डेले बताइन् । उनले भनिन्, ‘म पनि एउटी आमा भएकाले आमाको मर्म बुझेकी छु । हामी सबै मिलेर स्वर्गीय केशव दाईको परिवारलाई सहयोग गर्नुपर्छ ।’ सहयोग रकम बुझ्दा स्व. भट्टराईकी श्रीमती भावुक भएकी थिइन् ।
‘छक्का पञ्जा’ टिम अर्थात् दीपकराज गिरी समुहले पनि स्वर्गीय भट्टराईको परिवारलाई आर्थिक सहयोग गर्ने घोषणा गरेको छ । दीपकराजले फेसबुकमा एक स्टाटस लेख्दै स्व. भट्टराईको परिवारको आर्थिक अवस्था टिठलाग्दो रहेको सुन्दर दुख लागेको बताएका छन् । उनले लेखेका छन्, ‘यो पिडालाइ सम्झेर हाम्रो तर्फबाट १ लाख ११ हजार नगद सहयोग गर्ने निर्णय गरेका छौं ।’
२ दशकभन्दा लामो समय नेपाली फिल्म क्षेत्रमा विताएका स्वर्गीय केशव भट्टराइको निधनपछि उनको परिवार आर्थिक समस्यामा रहेको खबर बाहिरिएसँगै अहिले फिल्मकर्मीहरुले आर्थिक सहयोग गरिरहेका छन् । स्व. भट्टराईको परिवारलाई आर्थिक सहयोग जुटाउन समिति समेत गठन भैसकेको छ । केशव भट्टराईको गएको मंसिर ३० गते हृदयघातका कारण निधन भएको हो ।
