एक समय बलिउडमा एकछत्र राज गरेका अभिनेता गोविन्दा फेरि एकपटक नेपाल आउने भएका छन् । उनी यही कात्तिक २१ गतेबाट विरगञ्जमा हुन लागेको ‘नेपाल चलचित्र स्वर्णिम महोत्सव’ मा सहभागी हुनका लागि नेपाल आउन लागेका हुन् । उनलाई विशेष अतिथीको रुपमा निमन्त्रणा गरिएको चलचित्र निर्माता संघका अध्यक्ष आकाश अधिकारीले जानकारी दिए ।
उनका अनुसार, गोविन्दाले नेपाल आउने सेड्युल आफैंले बनाएका छन् । अध्यक्ष अधिकारीले भने, ‘भारतबाट नेपाल आउने सेड्युल उहाँ (गोविन्दा) आफैंले बनाउनुभएको छ । सम्भवतः उहाँ कार्यक्रम हुनुभन्दा २ दिन अगाडि नेपाल ओर्लिनुहुनेछ । र, कात्तिक २१ गते बिहान विरगञ्ज पुग्ने कार्यक्रम छ ।’ गोविन्दाले कार्यक्रममा आफ्नो प्रस्तुती पनि दिने उनले बताए ।
 (1)(2).jpg)
‘नेपालमा गोविन्दाको फ्यान फलोइंग ठूलो छ । त्यसमाथि विरगञ्जमा कार्यक्रम राखिएको हुँदा त्यहाँ भारतीय फिल्म मन पराउने दर्शक धेरै छन् । यसकारण पनि कार्यक्रममा सहभागी हुनका लागि हामीले गोविन्दाज्यूलाई आग्रह गरेका थियौं । उहाँले हाम्रो आग्रह सहर्ष स्वीकार गर्नुभयो’, निर्माता संघका अध्यक्ष अधिकारीले फिल्मीखबरसँग भने ।
अभिनेता गोविन्दा गएको वर्ष राजधानीमा भएको ‘एलजी फिल्म अवार्ड’ मा सहभागी हुन नेपाल आएका थिए । यसअघि पनि उनी थुप्रै पटक नेपाल आइसकेका छन् । उनकी श्रीमती सुनीता आहुजा नेपाली मुलकी हुन् । त्यसैले उनी नेपाललाई आफ्नो ससुराली देश बताउने गर्दछन् । उनले संसारमा आफूलाई सबैभन्दा मनपर्ने देश नेपाल बताउने गरेका छन् ।
‘नेपाल चलचित्र स्वर्णिम महोत्सव’ नेपाल चलचित्र निर्माता संघको आयोजनामा हुन लागेको हो । कात्तिक २१ गते राष्ट्रपति विद्यादेवी भण्डारीले उद्घाटन गर्ने कार्यक्रम तीन दिनसम्म चल्नेछ । महोत्सवमा नेपाली फिल्मका निर्माता, निर्देशक, कलाकार, प्राविधिक, लेखक, गीतकार, संगीतकार, गायिका, वितरक, प्रदर्शक तथा पत्रकारहरु सहभागी हुने बताइएको छ ।
